PLANTI moa hevi i kamap long Alotau, Milen Be Provins bihain long indai bilong Tommy Baker, lida bilong wanpela kriminel grup long provins.

Ol ripot i kam long Alotau i tok planti bagarap i kamap pinis na planti pret tu i stap. Ol meri na pikinini i pret long wokabaut na ol i stap tasol long haus.

Wanpela meri husat i no laik givim nem bilong em i tok, “Mi laik go long wok tasol mi pret. Ol wanwok bilong mi tu i pret.

“Yes Tommy Baker i dai pinis tasol moa man i kirap nau na kisim ples bilong em, na ol i moa nogut long Tommy. Ol i raun na bagarapim Alotau na mekim planti pipel i pret.

“Mi askim ol nius ripota long skelim gut ol ripot bilong ol na ripotim stori. Ol nius stori nau i no helpim mipela,” em i tok.

Ol nius media i ripot long dispela wik olsem polis i sutim na kilim Tommy Baker long pinis bilong yia 2021.