I NO bin gat planti trabel i kamap long i go taim bilong Krismas na Nu Yia long Nesenel Kepital Distrik (NCD) bikos ol polis i stap na i putim was long olgeta hap bilong siti.

NCD Metropoliten Supritenden Gideon Ikumu i tok ol polis i putim rot blok na i was long ol lain i save spak na draivim kar. “I no gat bikpela rot eksiden, ol lain i stilim kar o pasin bilong stil i kamap tasol pasin bilong spak na kamapim pait na bagarap ol samting em i wanpela salens i stap yet,” Suprintenden Ikumu i tok. Suprintenden Ikumu i tok polis i go hariap long taim ol i kisim toksave long ol trabel i kamap na ol arapela imejensi long NCD. Em i tok ol polis i mekim bikpela wok long kamapim gutpela sindaun long ol komyuniti. “Ol komyuniti i luksave na i amamas long gutpela wok ol polis i mekim,” Suprintenden Ikumu i tok.

UPNG Jenelism Sumatin Martha Mora Bokowi i raitim