YANGORU-Sausia Distrik i opim nupela Satelait Polis Stesin bilong en las wik long ples Sembo.

Dispela i mekim YangoruSausia Distrik i kamap namba wan distrik long traim yusim satelait polis stesin we polis dipatmen bai i putim long ol sampela rimot ples long PNG. Ol satelait polis stesin bai i helpim long daunim bikpela namba bilong kraim long ol distrik. Ol polis i luksave olsem hevi bilong hombru, kilim man, meri na pikinini, katim man, meri na pikinini nating na seksuel vailens na ol kraim egensim ol meri na ol pikinini meri. Memba bilong YangoruSausia Richard Maru na Asisten Polis Komisina na Boda Komanda Peter Philip i bin opim dispela polis stesin long Mande 27 Desemba. Long dispela polis stesin tupela polisman na wanpela polismeri bai i wok long en. Insait long dispela polis stesin fasiliti i gat opis, polis sel blok na haus bilong tupela polis opisa. Long taim em i opim dispela satelait polis stesin Mista Maru i salensim ol pipel long ol i mas lukautim dispela fasiliti na i mas senisim pasin bilong ol tu na sapotim ol polis long mekim wok bilong ol long Numbo eria long distrik bilong em. Long dispela taim tu Mista Maru i tokaut long polis operesen we bai i kamap long wanpela mun long taim bilong krismas na nu yia. Dispela operesen bai i kisim 12 moa polis manmeri long Wewak long helpim ol polis long Yangoru-Sausia.