MINISTA bilong Envairomen na Konsevesen na Klaimet Senis, Wera Mori i tok Nesenel Gavman i tingting nau long stopim olgeta bikpela wok bilong katim ol diwai long kantri long yia 2030.

Mista Mori i tok bisnis bilong katim diwai i save bringim planti bilien Kina i kam insait long kantri. Tasol Gavman bilong Papua Niugini i amamas long tokorait bilong ol wol lida long UN Climate Change Conference long Glasgow long Scotlan,( COP26), long stopim ol wok bilong katim ol diwai long bikbus long yia 2030.

 Mista Mori i askim strong long ol bikpela kantri husat i save tromoi planti ol poison gas long ol i mas baim kompensesen gut long PNG long taim em i stopim bisnis bilong katim ol diwai. Mista Mori i bin autim dispela tingting bilong gavman long dispela miting bilong COP26 long Scotlan. Long wanpela pres stetmen, Mista Mori i bin autim long Scotlan, em i tok olsem PNG i wanpela long 101 kantri long wol husat i gat strongpla laik long stopim olgeta wok bilng katim ol diwai long yia 2030.

Em i tok Praim Minista James Marape i strongpela sapota bilong dispela tingting. Minista Mori i tok tu olsem dispela tingting i stap nau olsem wanpela polisi bilong gavman long stopim ol wok bilong katim ol raun log long yia 2025 na bihain bai ol i stopim olgeta wok bilong katim ol diwai long yia 2030. Papua Niugini em i wanpela bilong ol kantri long wol we i gat ol bikbus o tropikal renfores i save helpim long bringim ol gutpela win na helpim long skelim gut klaimet senis long wol. Narapela samting em i gat planti ol enimal i save stap long en, na tu i gat planti diwai long bus we i gat marasin em ol pipel i save yusim. Tasol ol wok bilong katim ol diwai na kliaim bikbus i wok long bagarapim ol dispela gutpela samting, olsem na ol enviromen ektivis i save toktok na askim strong gavman long stopim ol kampani long katim diwai na bagarapim ol bikbus. Wanpela bilong ol dispela envairomen ektivis em Dorothy Tekwie. Em i bin wok bipo wantaim Greenpeace na tu em i wanpela mama graun na Presiden bilong Wes Sepik Kaunsil  ov Wimen. Em i tok em i laik lukim ol wok bilong katim ol diwai i mas stop long PNG pastaim long 2022 nesenel ileksen.