PRAIM Minista James Marape i tok i nogat asua long kamap bilong planti nupela projek i kamap long wanpela taim.

Em i tok kamap bilong dispela ol projek i bilong strongim ikonomi. Em i mekim dispela tok long bekim askim bilong Oposisen lida Belden Namah long save gavman i save gut long papa bilong dispela ol kampani wantaim wok bilong ol kampani bipo long em i sainim agrimen. Mista Namah i mekim askim long gavman i sainim ol agrimen long kamap bilong gol prosesing kampani long kantri na kabon treid pawa long Purari long Galp provins i no long taim i go pinis. Kabon treid agrimen em Minista bilong Envairomen na Konsevesen na Klaimet Senis, Wera Mori i bin sainim taim em i bin go long Glasgow UN Klaimet Senis kibung long Scotland i no long taim i go pinis. Gavman i bin sainim gol prosesing projek wantaim wanpela Singapore kampani i no long taim i go pinis. Namah i tok gavman i mas save gut long tingting na operesen bilong dispela ol kampani bipo long em i sainim ol agrimen. Em i askim sapos gavman i hariap long kamapim dispela agrimen bikos 2022 Nesenel Jeneral Ileksen i wok long kam klostu. Mista Marape i tok saining bilong dispela ol agrimen i no narakain long ol agrimen em gavman i sainim wantaim Porgera Gold Main, Wafi-Golpu main, Papua LNG na ol arapela bikpela projek. “Gavman i gat save na i opim dispela ol nupela projek,” em i tok. “I no gat asua long opim dispela ol projek long wanpela taim. “Larim proses bilong gavman i bihainim wok bilong em. Marape i tok dispela ol agrimen i bihainim o bai bihainim wan kain ol agrimen olsem Porgera. Long ol nupela agrimen, gavman i gat 51 pesen sea long Porgera Gol Main, P’nyang Gas Agrimen em gavman gat 61 pesen, PNG LNG Projek em gavman i gat 49 pesen, Papua (51 pesen) na dispela bai wankain long ol arapela projek olsem timba na piseri. Em i tok gavman i mekim gutpela agrimen we i bihainim ol tingting bilong em long bikpela tok long “Kisim Bek PNG,” aninit long ol wok divelopmen i kamap long kantri. Dispela bai wankain tu long ol daunstrim prosesing projek long maining, petrolium, piseris na forestri.

Paul Zuvani i raitim