GAVMAN bai tokaut long 2022 Nesenel Baset tude Fonde 24 Novemba taim Tresera Ian LingStuckey i bringim ripot long palamen.

Em i no klia yet mak bilong mani em gavman bai tokaut long em. Tasol long ol ripot i kamap, dispela mani i bai stap olsem K21 bilien. Dispela bai bikpela mani tru long ol yia i go pinis stat long taim kantri i kisim Independens. Long yia Mani Plen, gavman i bin kamapim K19 bilien we em i bikpela tru moa long ol yia i go pinis. Bihain long Tresera Ian Ling-Stuckey i tokaut long Mani Plen, Oposisen bai kisim wanpela wik long givim bekim bipo long Palamen i pasim ol kibung long dispela yia. Gavman i save tokaut long kain plen long Tunde tasol long dispela yia em i namba wan taim,  Tresera i

surukim dispela de i kam long tude. Praim Minista James Marape long las palamen kibung i tok gavman bilong em bai lukluk moa long helt sekta long 2022 Mani Plen. Dispela i arere long bikpela tingting bilong em long sapotim egrikalsa sekta. Marape i tok long dispela taim bilong wok, sefti bilong ol wok ples i bikpela samting. “Long helt sistem, long ventilesen sistem, long ring na kisim helpim na long veksin mipela i gat long em, dispela i nidim sapot. “Mipela i mas gat straktsa we i strong na i wok.” Long wankain taim, Marape i askim ol Provinsal Helt Atoriti (PHA) long ol i mas ripot long gavman long ol wok ol i mekim.. Em i tok nau yet ol PHA i wok long mekim wok ol yet na gavman i no save sapos ol i wok gut o nogat. Em i tok ol PHA i mas ripot long Nesenel Helt Dipatmen na Nesenel Kontrol Senta olsem gavman i save ol kain wok bilong coronavirus (COVID-19) ol i mekim. “Ol wok bilong Provinsal Helt Atoriti em ol sampela samting em gavman i lukluk long ol long baset bilong neks yia,” Marape i tok. “Ol PHA i wok long kamapim ol wok ol yet na i no tingting olsem dispela wanpela bikpela pait em kantri na wol wantaim i wok long pait long em. Marape i askim ol PHA long  ripot bek long Helt Dipatmen na Nesenel Kontrol Senta long ol wok ol i mekim. Long wankain taim, Tresera Ian Ling-Stuckey i bin tok Wol Benk i redi long helpim kantri wantaim K1 bilien long 2022 Nesenel Baset. Em i tokaut long dispela bihain long bung bilong em wantaim Wol Benk Va i s - P r e s i d e n Manuela Ferro i no long taim i go pinis.