Praim Minista James Marape i tok Kainantu Gol Main long Isten Hailans inap stat gen taim gavman i lukim olgeta agrimen i stret.

Em i tok dispela agrimen bai wankain olsem ol arapela agrimen em gavman i bin kamapim wantaim ol projek olsem Porgera long Enga na Wafi-Golpu (Morobe). Em i mekim dispela tok long Palamen kibung long Tunde taim em i bekim askim bilong Isten Hailans Gavana, Peter Numu long wanem taim Nesenel Ekseketiv Kaunsil (NEC) bai givim tok orait long main i op gen. Em i tok gavman bilong em inap kisim gutpela mani long sapotim provins taim main i op. Em i tok K92 Maining Kampani, i kamapim ol wok long divelopim projek na i bin putim aplikesen long kisim spesel maining lis (SML) laisens long divelopim projek tasol em i klostu long foapela yia nau i nogat wanpela tok i kam long gavman. Em i tok bikos agrimen i no kamap, provins bilong em i wok long abrusim planti ol gutpela samting long sapotim em yet. “Mista Praim Minista, mipela i amamas long Maining Minista i wok long go long ol maining projek long ol narapela provins tasol i no tingting long projek i stap long ilektoret bilong em yet,” Numu i tok. “Dispela i min pasto i wok long helpim ol narapela lain tasol lus tingting long famili bilong em i lus long paia.” Mista Marape i tok em i save gut liklik long Kainantu Main na bihainim ol lo bilong kantri bai bung wantaim NEC long ol i ken lukluk gen long SML aplikesen bilong K92 kampani. Kainantu Main em Barrick Niugini i bin save lukautim tasol long 2017 i bin salim long K92 Maining kampani. Kampani i yusim pinis moa long C$10 milien (K24 milien) long stretim ol samting bipo long wok i stat tasol i wet long kisim tok orait long NEC.