PRAIM Minista James Marape i tok gavman bai stretim yet WauBulolo na Menyamya-Aseki rot long Morobe Provins long liklik taim.

Em i tok dispela em i wanpela ikonomik rot em, gavman bai i no inap long lus tingting long em. Em i mekim dispela tok long bekim askim bilong Morobe Gavana, Ginson Saonu long Palamen kibung long Tunde. Mista Soanu i askim long wanem taim gavman bai stretim dispela rot bihain long Mista Marape: Memba bilong WauBulolo, Sam Basil; Minista bilong Woks, Michael Nali; ol opisal bilong Australia Hai Komisin; na em yet i bin mekim wokabaut i go long Wau-Bulolo rot long gavman i mas stretim dispela rot. Em i tok gavman i bin makim wanpela nesenel woks kampani long stretim dispela rot long mani mak bilong K66 milien em Australia gavman i givim. Em i tok bihainim dispela makim inap nau nogat wanpela wok i kamap yet. Soanu i tok i gat planti bikpela ol samting i stap long dispela hap we i wok long strongim kantri o bai strongim kantri na i no gutpela dispela rot i bagarap. Ol samting olsem K1.18 bilien Hidden Veli Gol Main, K9.1 bilien Wafi-Golpu Main, Zenang Kakaruk Fam, ol kopi na pinat bilong Menyamya na Aseki, wantaim Yunvesiti bilong Teknoloji, Igam Bareks na Angau Jeneral Haus sik long Lae. Marape i tok gavman i no paul olsem em i no gat ai na yau long save. Em i tok dispela K66 milien bai stretim tasol sampela hap bilong dispela rot tasol gavman I lukluk long stretim gutpela dispela rot. I no hap hap tasol. Em bai toktok wantaim Mista Nali long painimaut gut trupela kos bilong stretim gut rot olsem ol i ken givim gutpela long mani mak em wok. Em i tok bikos long dispela as wok i no stat yet. Em i no tokaut long wanem taim wok stretim bai kamap.