LONG taim Papua Niugini i bungim yia 2040, bai i gat ol bikpela rot i konektim olgeta rijon bilong kantri.

Na long winim dispela driman, Konekt PNG Plen, Gavman bilong James Marape bai spendim samting olsem  K7.1bilien long namba wan hap bilong program long stretim na wokim ol rot na bris insait long kantri. Namba wan hap bilong dispela program i karamapim 2020 i go inap long 2027. Aninit long dispela 100 pesen Rot Konektiviti Plen, bai i gat foapela hap bilong en. Nesenel Dipatmen bilong Woks bai i mas putim K1 bilien na K1.5 bilien long wan wan yia long winim dispela mak. Long taim olgeta dispela wok i pinis, bai i gat rot i konektim olgeta rijon bilong kantri. Dipatmen bilong Woks i bin putim bikpela toksave long dispela driman bilong gavman long midia long dispela mun. Em i tok olgeta yia, gavman i save putim mani long stretim ol bikpela haiwe long kantri, tasol wok i save ran i go na stop long taim mani i sot. Olsem na long dispela nupela plen bilong gavman, ol bai putim mani bilong mekim dispela wok long wan wan yia i go inap long 2040. Gavman bilong Marape i wokim tripela bikpela disisen long strongim wok bilong Konekt PNG Plen. 1. Gavman i tok orait long lo we i mas givim minimum fanding komitmen long Nesenel Baset i go inap long yia 2040. Dispela disisen bai stretim hevi bilong mani i save sot oltaim long pinisim wok bilong ol rot program na rot mentenens na nupela konstraksen. 2. Gavman i tok orait long kamapim PNG Highways Corporation husat bai go pas long mekim wok bilong Konekt PNG Plen.  Dispela kampani bai menesim na bihainim stretpela pasin bilong rot sekta long mekim ol wok bilong Konekt PNG Plen. 3. Gavman i kamapm PNG Road Fund aninit long Road (Management and Fund) Act, 2020 long kisim rot mentenens fanding long taim em i sasim ol fi long ol lain i save yusim ol rot na bai yusim dispela mani long lukautim ol rot ol i bin kamapim aninit long Konekt PNG Plan. Dispela komitmen bilong Gavman bai mekim rot sekta i kisim PNG i go long level we bai lukim kantri i kamap wanpela midel-inkam kantri. Ol pipel i ken amamas long gutpela laip na helpim ol i kisim long ol rot aninit long Konekt PNG Plen.