MADANG Provinsal Haus Sik i no gat spes nau long putim bodi bilong ol manmeri. Mog bilong haus sik  i pulap tru wantaim ol dai bodi. Sampela ol dispela dai bodi em bilong las yia 2020 yet na  stap.

James G. Kila i raitim

Sif Ekseketiv Opisa (CEO) bilong Madang Provinsal Helt Atoriti (MPHA), Fidelis Waipma i tokaut long dispela las wik. Waipma i mekim toksave bilong em long NBC Redio Madang long ol pablik long provins long go kisim ol bodi na karim i go planim Waipma i tokaut olsem sampela ol dispela bodi long mog bilong Madang Haus Sik em ol bodi bilong las yia yet.

Em i tok bihain long toksave bilong ol dispela wik sapos nogat lain  i go kisim ol bodi bai MPHA kisim ol bodi i go planim long wanpela hul long matmat. Waipma i tokaut tu long arapela ripot olsem Madang PHA bai no inap moa kisim ol voluntia lain long wok bilong COVID-19. Fidelis Waipma i tok klia olsem  las mun ol voluntia husat i wok long COVID-19 veksinesen long Madang Jeneral Haus Sik i bin kros long alawens bilong ol na i stop long wok. Dispela ol voluntia em MPHA i kisim ol long wok long veksinesen  bikos ol i sot long ol wok manmeri long bikpela haus sik.

Mista Waipma i bin bekim askim bilong ol nius lain bihain long ol voluntia i bin protes na stop wok long las mun olsem na MPHA i gat hevi long sait long peim  ol dispela voluntia long gutpela wok helpim ol i wokim.

Em i tokaut klia olsem pei bilong ol dispela voluntia em MPHA i kisim na yusim mani i kam long COVID-19 mani helpim i kam long Dipatmen ov Fainens naTreseri. Mista Waipma long dispela taim tu i tokaut klia olsem pastaim tru ol i bin toktok wantaim ol voluntia na i bin kamap wantaim wanbel-tingting olsem ol voluntia sevis bilong ol dispela lain manmeri husat i wok olsem voluntia bai i go inap long mun Desemba long dispela yia na i go inap stat bilong mun Janueri 2022. Dispela wok bai kamap bihainim COVID-19 i muvmen insait long Madang provins.