Ezekiel Lawrence i raitim “TUPELA nogut pasin i no inap mekim kamap gutpela pasin, olsem tasol yumi ol disaplin fos i mas wok bihainim stretpela pasin olgeta taim.”

Dispela em i toktok bilong Asisten Komisina na Divisenal Komanda bilong NCD na Sentral, Anthony Wagambie Jr.

Komanda Wagambie i mekim dispela toktok bihain long sampela soldia bilong PNGDF na sampela polis bilong RPNGC i pait namel long ol yet long Mande moning long dispela wik long Boroko Polis Stesin. Hevi namel long tupela disaplin fos i kamap bihainim hevi bilong Sarere 20 Novemba taim ol polis i bin go mekim nambaut  long haus bilong wanpela soldia long Taurama Bareks.

Long Mande moning, dispela soldia i go givim komplen long Boroko Polis Stesin na i wok long toktok wantaim Polis Stesin Komanda i stap na sampela wanwok soldia bilong em i kam long wanpela kar na holim wanpela polis kar wantaim ol polis opisa long dispela kar na kisim gan na kar bilong ol dispela polis na i go.

Sampela polis opisa na difens opisa i kisim bagarap long dispela hevi. Ol i no sutim wanpela man olsem toktok i raun long sosel midia. Komanda Wagambie Jr i tok komplen bilong dispela hevi bai stap aninit long wanpela Komisin Opisa long stretim na givim praioriti long em. Komplein i stap pinis wantaim Intenel Investigesen  Unit (IIU) long Boroko wantaim komplen bilong soldia i bungim hevi long Sarere.

“Mipela i gat gutpela Intenel Investigesen Unit (IIU). Taim mi kisim opis long 2019, mi na menesmen tim bilong mi i givim gutpela sapot long IIU long mekim wok investigesen,” Wagambie Jr i tok. “Yumi olsem ol memba bilong disaplin fos, yumi mas bihainim disaplin olgeta taim,” em i tok.

“Olsem tasol mi laik singaut long ol hetman bilong PNGDF long lukautim ol soldia bilong ol na givim sas long ol dispela lain husat i wokim hevi long Mande moning.” Komisina i tok.

“Mi laik tok klia na strongim ol pipel, PNGDF na ol polis olsem dispela hevi i stap aninit long kontrol bilong mipela,” em i tok. Komanda Wagambie i tok dispela hevi i bin kamap i no soim kala na stail bilong ol militeri fos. Hevi i kamap namel long ol liklik lain tasol na komanda bilong ol i no save. Dispela hevi i no ken bagarapim gutpela nem bilong man na meri insait long PNGDF.

“Mi tok tenkiu long ol PNGDF opisa na Militeri Polis long kisim bek polis kar na ol gan bilong ol polis i kam bek long Boroko Polis Stesin,” Wagambie Jr i tok.