I gat nupela polis kliarens setifiket i senisim olpela fomat ol Royal Papua Niugini Konstabulari i save givim long las 46 yia i go pinis.

Polis Kraims Divisen i tok aut long dispela nupela setifiket na i stat long yusim long Mande 15 Novemba. Asisten Komisina bilong Kraim, Hodges Ette i tok dispela nupela setifik bai banisim na daunim hevi bilong ol giaman o feik polis kliarens setifiket ol manmeri i save hait na kisim long sait. Asisten Komisina Ette i tok olpela fomat bilong mekim polis kliarens setifiket i gat planti krangki wok i save kamap.

Ol man meri i save printim setifiket ausait long sistem bilong polis na i save yusim. “I gat ol giaman lain i save yusim nem na atoriti bilong RPNGC na mekim ol setifik nating,” Ette i tok.

Em i tok dispela i save givim nem nogut long RPNGC na ol gutpela woklain insait long wan wan dipatmen. Bipo ol polis i save sasim K10 fi long kisim polis kliarens setifiket tasol nau ol i save kisim K65 long ol lain i laik kisim kliarens setifiket. Ette i tok polis i save kisim klostu olsem K9,000 long ol aplikesen ol i kisim long kliarens setifiket long wan wan de long Nesenel Kepital Distrik tasol. Em i tok long dispela yia ol i kisim K800, 000 long polis kliarens fi tasol.

“Dispela setifiket i kam long 3-pela kategori, wanpela i bilong ol sitisen, wanpela i bilong ol ovasis manmeri na mipela i stretim wanpela bilong ol PMV wantaim,”

Ette i tok. Ette i laikim Moto Viakel Insurens Limitet (MVIL) na transpot sekta long yusim dispela kliarens setifiket bilong ol PMV. Em i tok sampela  kategori tu bai kamap bihain  wantaim fi bilong ol yet. Em i tok sapos wanpela man i laik kisim wok olsem sekyuriti gat bai i mas baim K65 na narapela i laik kisim wok olsem hetman bilong wanpela gavman dipatmen bai i mas baim K1000 long polis kliarens setifiket.

Polis i stat nau long kamapim ol sistem long wokples bilong ol we ol i ken yusim long wan wan hap ol i stap long em. Dispela sistem bai pulim intres bilong arapela stekholda olsem Nesenal Stetistikol Opis (NSO), Foreign Afeas na ol arapela ogenaisesen.