“OLGETA rot long siti i pulap long kain kain ol ros kar i no fit long ran long rot.”

Hetman bilong Ilisit na Nakotik Investigesen na Asisten Komisina bilong Polis, Donald Yamasombi i mekim dispela tok bihain long klostu em i bungim hevi long rot wantaim wanpela PMV kar. Asisten Komisina Yamasombi i tok planti keles draiva i save givim bikpela sans long kamapim hevi long rot wantaim ol arapela kar o ol  manmeri i save wokabaut arere long rot.

Em i tok rekot bilong ol long rot trefik eksiden i save kamap bikpela long olgeta de na i givim bikpela hetpen long ol trefik opisa.

“Yumi gat gutpela lo bilong trefik tasol i mas i gat strongpla implementesen long ol dispela lo,” Yamasombi i tok.

“Ol polis i redi tasol long helpim ol dipatmen husat i go pas long strongim dispela ol trefik lo,” em i tok. Em i tok ol PMV i save operet insait long siti na arapela i save kam olsem long Sentral na Galp Provins i mas kam long sekap pastaim na bihain ol i ken operet long rot.

Yamasombi i tok ol kar i save brukim lo na draiv i go na stop long ol hap bilong wokabaut o i save stop arere long ol hap bilong flawa na ol trefik ailan na dispela i save bagarapim piksa bilong ples. Em i tok gavman i mas lukluk gut long dispela kain hevi na traim long stretim.