DATA, infomesen na ripot em i impoten long lukautim nesenel sekyuriti bilong wan wan man insait long kantri na ol arapela pipel husat i laik stap o raun long dispela kantri.

SIf Maigresen Opisa, Stanis Hulahau i tok imaigresen i mas kamapim strongpela sistem bilong lukautim ol infomesen na ripot  na soim aptu-det rekot bilong olgeta non-komplaien manmeri husat i kam insait na stap long PNG. “Taim yumi gat gutpela menesmen sistem bilong lukautim ol rekot bilong ol manmeri i kam insait long kantri bai dispela i helpim yumi long lukautim ol pipel bilong yumi long ol lain husat i laik bagarapim nem na sekyuriti bilong pipel na kantri.” Hulahau i tok. Papua Niugini Imaigresen na Sitisensip Atoriti (ICA) i lonsim nupela menesmen sistem; Komplaens Treking Sistem o COMtrac long PNG ICA hetkwata long Waigani long 17 Novemba 2021.

Dispela nupela menesmen sistem bai helpim ol woklain bilong Komplaens, Enfosmen na Legal Opisa long rekodim ol infomesen bilong ol manmeri i kam long kantri na i brukim lo bilong kantri. Dispela sistem i rausim menual sistem ol i save yusim bipo na bai mekim wok isi long ol opisa long glasim gut rekot na histori bilong ol manmeri. ICA em i namba wan gavman ejensi long kisim COMtrac sofwea aplikesen long wanpela saplaia long Australia long helpim ol wantaim wok bilong ol.

COMtrac bai helpim ol ICA opisa long kisim infomesen bilong ol non sitisen husat i gat hevi long visa, ol manmeri husat i kam nating long PNG na no gat luksave long em, ol manmeri husat i gat rekot bilong dipotesen na ol lain keis bilong ol i stap long kot.