LONG Mande 1 Novemba Etep Rurel Haus Sik, long Tewai-Siassi distrik, Morobe Provins bai i pasim olgeta sevis bilong en na bai i stap pas inap em i kisim sampela helpim mani long ranim ol sevis bilong en.

Dispela rurel haus sik long Papua Niugini i kisim hevi bilong nogat mani na mas pasim ol sevis bilong en. Las mani em i bin kisim em long mun Epril dispela yia. Menesmen bilong haus sik i singaut long olgeta stekholda long helpim em long go het yet long sevim ol pipel bilong Morobe Provins. Long dispela taim em i bihainim namba tu plen bilong en long katim ol sevisi isi isi. Namel long 1-14 Oktoba Etep Rurel Haus Sik long Morobe Provins i katim bek ol sevis bilong en long autpesen, klinik bilong ol dokta na sampela operesen na bai i lukluk long ol imejensi tasol. Stat long 15 Oktoba i kam inap 31 Oktoba ol bai i katim daun sevis long klinik bilong ol mama na bebi na sevis bilong imunaisesen na ol bai i lukluk long ol sik manmeri klostu long haus sik tasol. Ol bai i salim olgeta sik manmeri bilong Kabwum eria i go bek long kisim helpim long ol helt fasiliti long Kabwum. Na tu ol bai i salim ol sik manmeri na pikinini long ol wod i go bek long haus bilong ol. Long dispela taim tu bilong COVID-19 ol i strongim ol pipel long prektisim ‘nupela nomol’ na sapos ol i kisim ol liklik sik ol I mas helpim ol yet long haus. Dispela Luteran helt sevis i givim sevis long ol pipel bilong Kabwum, Raikos na Long Ailan long Madang na Siassi Ailan. Etep Haus Sik traim hat tru long planti yia nau long givim helt sevis long ol pipel wantaim liklik mani tasol.