OL Provinsal Helt Atoriti (PHA) i mas ripot long gavman long ol wok ol i mekim, Praim Minista James Marape i tok. Em i tok nau yet ol i wok long mekim wok ol yet na gavman i no save.

Em i tokaut long dispela long NBC TokBek So long Mande dispela wik. Em i tok ol PHA i mas ripot long Nesenel Helt Dipatmen na Nesenel Kontrol Senta olsem gavman i save ol kain wok bilong coronavirus (COVID-19) i kamap. “Ol wok bilong provinsal helt atoriti em ol sampela samting em gavman i bai lukluk long ol long dispela kibung,” Marape i tok. “Ol PHA i wok long kamap bilong ol yet na i no tingting olsem dispela wanpela pait kantri i wok long pait long em. “Ol i no save ripot bek long Helt Dipatmen na Nesenel Kontrol Senta long ol wok ol i mekim.” Marape i tok dispela i wanpela hevi em i mekim disisen long no ken go long Yunaitet Nesen Klaimet Senis kibung long Glascow, Scotland long neks wik. Em i tok pait long COVID-19 i bikpela samting na em i mas stap long stretim dispela hevi. Em i tok ol helt savemanmeri wantaim Wol Helt Ogenaisesen (WHO) i luksave olsem helt sistem bilong mipela i no strong na dispela inap bagarapim kantri. Dispela hevi i kisim tu salens long nesenel sekyuriti bilong kantri. Em i tok ripot bilong COVID-19 bai helpim tu gavman long kamap wantaim kain mak bilong mani long 2022 Mani Plen. Palamen bai bung long 16 Novemba long tokaut long 2022 Nesenel Baset na tu pasim dispela baset.