Paul Wagum i raitim OPIS bilong Bogenvil Ilektoral Komisin (OBEC) i bin surukim taim bilong holim ileksen bilong ol Komyuniti Gavman na tu bai-ileksen bilong Atols Konstituensi.

Tupela ileksen wantaim i bin mas kamap, stat long Mande 18 Oktoba, tasol nau tupela ileksen wantaim bai kamap bihain liklik bikos ol metirel bilong ranim ol ileksen  i no kamap yet long Rijon. Nan tu opis bilong Bogenvil Ilektoral Komisina i no save wanem taim tru ol dispela samting bai kamap. Bogenvil Ilektoral Komisina, George Manu i bin tokaut long dispela long wanpela Media Konprens em bin holim wantaim ol nius manmeri long Buka. Mista Manu i tok gavman i no givim mani hariap bilong ranim dispela tupela ileksen olsem na OBEC i no bin baim ol samting bilong ranim ileksen hariap. Em i tok ol balot pepa tasol i stap. Dispela em namba tu taim bilong ABG long ranim ol ileksen bilong ol Komyuniti Gavman. Bai-ileksen bilong ol Attols i kamap bikos memba bilong ol Jerry Napto i bin lusim laip bilong em long solwara namel long Buka na Nissan long han bilong ol sampela birua (sea pirates). Em bin lusim laip bilong em wantaim sampela ol famili bilong em. I gat bilip olsem polis long Bogenvil i  holimpasim pinis sampela long ol dispela lain man husat i bin mekim dispela pasin, na wok painim bilong holim sampela moa man husat i mekim dispela pasin birua, i wok long go het yet. Komisina Manu i bin givim bikpela tok sori long olgeta kendidet na ol sapota bilong ol long dispela hevi.