DISPELA “No Jab, No Job” polisi bilong ol praivet sekta i wokim Ombudsman Komisin i singaut long ol long was na wok taim em i kam long konstitusen raits bilong ol sitisen na lukluk bilong mandetori veksinesen we ol praivet sekta i wok long pusim ol pipel long kisim.

O m b u d s m a n Komisin i luksave wantaim wari olsem planti ogenaisesen, i lukluk strong long ‘No Jab, No Job’ polisi long wokples we i kamapim hevi wantaim raits bilong ol sitisen husat no kisim veksin. “Wantaim dispela, Komisin em i tingim yet ol praivet sekta na raits na wok bilong ol long lukautim bisnis bilong ol, mipela i laik tokim ol long kamap wantaim wanpela agrimen we em i no bagarapim raits bilong ol wok manmeri long bihainim laik bilong ol. Ol pipel mas gat sans long mekim disisen na dispela sans mas no ken lus long ol”, Sif Ombudsman Richard Pagen i tok. O m b u d s m a n Komisin i askim ol praivet sekta long lukluk na skelim ol narapela rot long lukautim raits bilong ol wok manmeri husat i les long veksin. Mista Pagen i tok, Ombudsman Komisin i nogat rait long praivet sekta, tasol em i bos bilong pablik edmistresen. Em i wok long lukautim konstitusen raits bilong ol sitisen  bilong dispela kantri. Maski Ombudsman Komisin i nogat klia tok orait long sait bilong raits bilong ol manmeri, em i gat tok klia long lukluk long pasin we i bagarapim wanpela narapela aninit long Seksen 218 (b) na Seksen 219 (1) (c) bilong konstitusen. Dispela ‘antidiscrimination na equal opportunity’ pawa em i givim narapela hap bilong mendet long Ombudsman Komisin long wok long was long rait bilong ol pipel aninit long ol bihainim jeneral pawa bilong ol. O m b u d s m a n Komisin i tok yet olsem long banisim diskriminesen we i wok long kamap long ol sitisen bilong Papua Niugini long sait bilong COVID 19 veksin. Ol i singaut long ol releven gavman atoroti we save wok wantaim ol praivet kampani long luksave long ol wok na pasin taim em i kam long sait bilong ol raits na fridom bilong ol pipel. O m b u d s m a n Komisin i save olsem PNG em i sainim sampela bikpela Human Rights Treaties na Nesenel Konstitusen we em i narakain tru na em i gat klostu olgeta raits na fridom i stap insait long United Nations Charter na Universal Declaration of Human Rights bilong 1948. Olsem wanpela signitori i go long dispela UN Human Rights Treaties na Conventions, mipela olsem wanpela kantri i gat wok long wok wantaim ol sitisen bilong yumi long luksave olsem ol rait na fridom em i no lus na sans em ol respektim, Sif Ombudsman i tok. O m b u d s m a n Komisin i singaut long ol we i bin kisim hevi long sait bilong dispela veksin mandet o ol we i bin kisim nogut tritmen long wokples long toksave long bel hevi bilong ol wantaim ol.