LONG eli monin awa blo tunde namba 26 dei blo dispela mun wanpela yangpela mangi long sabama area insait lon NCD i sokim komuniti taim ol i painim emi i hangamap long nek insait long lokal SDA sios bilong Sabama.

Dispela mangi emi raunim rop long nek bilong em na pinisim laif blo em yet. Krismas bilong emi istap olsem long  17pela Krismas na emi bilong Enga na Hela province na isave stap yet tu long sabama na isave lotu long dispela SDA sios. Elda bilong Sabama SDA  sios Mr Gaksy Namoi husat isave stap arere long Hauslotu itok “mi kirap long monin na laik go waswas lo warapless insait lo banis blong Hauslotu taim mi lukim na painim out olsem youngpla mangi ya ikisim laif blo emi yet. Mi kirap nogud tru na ron  igo toksave lo ol hauslain na femili blo mi na mipla igo ahed na ringim ambalans na polis” Ol forensic polis tu ikam igo lo hap blilong indai na igo mekim wok painim out na sekim evidens lo lukim sapos ibin gat sampla narapela lain husat i stap long taim dispela yangpela mangi  bin indai. Sampla ol manmeri insait long congregesen bilong sios itok mipela isave lukim dispela youngpla mangi iwok long go tru long sampla bikpla problem na iwok long gokam lo hauslotu olgeta dei lo  beten. Ol ino ting em bai kisim laif blo em yet na planti i faul nogud tru. Longtime sios memba bilong sabama SDA sios Mr Paul Hage tu itok “ Dispela emi  nambawan taim wer kain hevi ikamap insait long hauslotu blo mipla na emi niupla kain samtin olgeta, mipla sios bai wok wantem polis na femili blo dispela yangpela mangi lo painim out hass bilong dispela indai na pinisim dispela hevi’.

Paul Oeka i raitim