PAPUA Niugini bai gat gutpela sans long kisim gutpela win mani long ol risos bilong em, Praim Minista James Marape i tok.

Em i tok wol nau i lukluk long strongim ol wok i go wantaim klin eneji we ol projek olsem gas i bikpela samting long kantri. Em i mekim dispela tok long bekim askim bilong Memba bilong Not Flai, James Donald long Palamen kibung long Tunde dispela wik. Mista Donald i bin askim long as gavman i no bin askim ol pipel bilong em na Westen provins long go wantaim gavman tim long Amerika i no longtaim i go pinis long sainim agrimen long divelopim P’nyang Gas Fil. P’nyang Gas Fil i stap long Not Flai long Westen Provins. Praim Minista i tok dispela bung i bilong gavman level tasol olsem na gavman i no kisim wanpela mausman bilong ol. Em i strongim tinging bilong Memba olsem taim Oil na Gas agrimen i kamap aninit long lo, gavman bai kisim ol long stap insait long agrimen. Em i tok long nau, Memba i no ken tingting planti long wanem wol i lukluk long go insait moa long wok bilong klin eneji na ol gas projek olsem P’nyang inap helpim gut ol pipel bilog Westen, moa long ol papagraun. Dispela i min taim ol kantri olsem Australia we i yusim tumas koul (coal) long ol faktori long kamapim ol samting bai mas pinis na lukluk long ol arapela samting olsem gas na wara long kamapim ilektrisiti o pawa. Taim kain disisen i kamap na laik i bikpela, ol kantri bai lukluk long gas long mekim wok. Dispela bai mekim prais bilong gas olsem long P’nyang projek bai i go antap na ol papagraun, provinsal gavman na kantri wantaim bai kisim gutpela win mani.