OL Katolik Profesinel Sosaiti bilong PNG i bin lonsim namba foa Daiosisen Sapta long Lae las Sande bihain long ol i mekim wankain long Pot Mosbi, Alotau na Madang.

Apostolik Nuncio bilong PNGSI, His Excellency Akbisop Fermin Emilio Sosa Rodriguez wantaim Bisop Rozario Menezes, SMM bilong Daisis bilong Lae i bin mekim dispela lonsing. Long taim bilong kisim komunio, ol 14 man na meri bilong ol kain kain wok i bin mekim tok promis bilong ol long mekim komitmen long wok long sosaiti na sios long kamap “lait na maus bilong katolik sios” long ol famili, komyuniti na wok ples bilong ol. Ol i laitim ol kendel na holim wantaim ol liklik diwai kros na kisim prea bilong Blessed Peter Torot bilong makim komitmen long sevim sios. Akbisop Fermin i strongim ol memba na olgeta Katolik sios memba long stap long gutpela laip. Bisop Rozario i tokaut strong long pipel i mas veliuim gospel na skul bilong Katolik sios bilong daunim pasin nogut bilong graun. Na Pater Victor i toktok long strongim tripela P, em ol, prea, pesistens na prea. Paul Harricknen i autim amamas bilong em long Akbisop Fermin long kam na witnesim dispela. Em i tok dispela i soim komitmen bilong Rome long strongim wok bung wantaim bilong em na ol Katolik Profesinel bilong PNG. Em i tok tenkyu long Bishop Rozario long tok orait long Lae Sapta na em i tok dispela em i impoten samting tru. Em i tok Lae i ken kamap senta bilong CPD na ol sios ektiviti bikos em i stap long sentral lokesin.