LIFE PNG Care wanpela Charity ogenaisesen  long Pot Mosbi husat i save wok strong tru long lukautim ol pikinini long strit na setelmen long sait bilong skul na kaikai i askim gavman  na ol bisnis haus insait long Pot Mosbi long helpim ol wantaim sampela mani long ol i ken wokim wok bilong helpim ol pikinini long neks yia.

Hetman na faunda bilong Life PNG Care Collin Pake i wok strong tru long painim sampela mani long mak bilong K400,000 long surukim wok bilong helpim moa long 500 pikinini husat i stap insait long lukaut bilong LPNGC na tu long ranim ol narapela ol program olsem mobail skul program bilong ol long neks yia. Mobile skul program bilong Life PNG Care em ol i ranim long Erima, Gerehu, na Baruni na ol narapela hap tu insait long siti. Mista Pake i bin kamapim dispela ogenaisesen long 2013 na em i bin save kisim ol pikinini long rot na setelmen husat ol mamapapa i lusim nating na lukautim ol. Tasol nau ol i pasim ol mobail skul bilong ol long sampela hap pinis bikos i nogat inap mani moa long mekim ol dispela wok. Mista Pake i tok, “I gat moa long 4,000 strit pikinini insait long Pot Mosbi na dispela namba em bai go antap yet sapos gavman i no luksave long dispela hevi. Olgeta de moa long tupela o tripela pikinini i save painim ples long stap na i save kam long mipela long LPNGC. Tasol mipela i nogat moa spes na mani long lukautim ol. Sapos LPNGC i gat fanding bai mipela i ken helpim dispela ol pikinini tasol mipela i nogat inap mani”. Long neks yia Life PNG Care bai salim 500 pikinini i go long skul na ol i askim long bel bilong ol sapos ol gavman ogenaisesen na ol bisnis haus i ken lukim hevi bilong ol na helpim ol long skul bilong dispela ol pikinini.

Paul Oeka i raitim