OL DOKTA i no ken rausim ol sik manmeri, Praim James Marape i tok. Em i tok em i wok bilong ol long sekim na stretim ol sik manmeri.

Marapela i mekim dispela tok long bekim askim bilong Memba bilong Abau, Sir Puka Temu long Palamen Kibung long asde. Sir Puka i bin askim long as ol dokta na nes long Nesenel Kapital Distrik, moa long Pot Mosbi Jeneral Haus sik i tok nogat long ol sik manmeri long Sentral Provins taim ol i laik kisim helpim. Dispela em moa long ol lain husat i laik sekim stap bilong ol long sik coronvirus (COVID-19). Sir Puka i tok planti bilong ol sik lain i go long Kwikila Helt Senta, Rigo long Sentral Provins long kisim helpim tasol dispela i inap long kisim liklik lain tasol. Long dispela as ol i mas go long Pot Mosbi long kisim helpim. “Mi no amamas na mi tok sori long harim olsem ol dokta i mas tok nogat long ol lain husat i laik kisim helpim, moa long ol pipel bilong Sentral Provins,” Marape i tok. “Dispela i no mas kamap na sapos i kamap, i mas stop.” Marape i tok gavman i givim pinis K20 milien (long 2020 na 2021 ol Mani Plen) long kamapim wanpela haus sik bilong Bautama, ausait long Pot Mosbi long ol pipel bilong Sentral provins i kisim helpim. Tasol em i no amamas long wei ol provinsal helt atoriti long planti ol provins i yusim dispela K4 milien em gavman i bin givim long ol provins long kamapim ol Aisolesen Senta na redim ol haus sik wantaim ol bed long lukautim ol sik manmeri. Em i tok gavman i givim wanpela yia olgeta (las yia) long ol PHA i kamapim ol kain wok olsem tasol inap long nau, planti bilong ol PHA i no mekim gutpela wok. Em i tok Kebinet long dispela wik i tok orait pinis long givim moa mani long ol provins olsem Isten Hailans husat i bungim bikpela hevi bilong COVID-19. Em i tok gavman i no inap long givim nating mani long ol provins tasol long ol provins we i soim ol inap long menesim gut mani na ol provins we i nidim tru helpim.

Paul Zuvani i raitim