BOUGAINVILLE Executive Council (BEC) bilong Atonomus Bogenvil Gavman i kamapim Ministerial Tasfos bilong COVID-19  bihain long ol keis bilong Delta Variant i go antap kwiktaim tru long ol narapela provins long PNG.

Dispela Tasfos i kamap wantaim sapot i kam long Dipatmen bilong Helt long setim ol impoten mesa long pasim delta variant long go insait long Bogenvil. Ekting Siaman bilong tasfos na Minista bilong Pablik Sevis Emmanuel Carlos Kaetavara i tokaut long dispela las wik na em i tokaut tu olsem ABG bai putim ol strongpela lo bilong lukautim helt na laip bilong ol pipel long Bogenvil. “Delta Varient i save kalap kwiktaim long wanpela na narapela. Na em i kilim planti pipel. Olsem na gavman i wok wantaim helt dipatmen long putim ol mesa bilong ol pipel long bihainim.” Mista Kaetavara i tok. Long wankain taim Mista Kaetavara i tok long dispela taim i nogat marasin bilong rausim COVID-19, tasol ol saintis na ol medikal ekspet i mekim veksin bilong banisim ol pipel long dispela sik. Em i askim ol pipel bilong Bogenvil long kisim veksin. Em i askim ol pipel long bihainim ol mesa we bai ABG bai setim na tu bihainim nupela pasin. Ministerial Tasfos i gat ol Minista bilong Dipatmen bilong Jastis, Komyuniti Gavman, Fainens na Presiden husat i ekting Minista bilong Helt.