OL PAPAGRAUN bilong P’nyang Gas long Not Flai, Westen Provins bai kisim gutpela win mani long gas bilong ol, Praim Minista James Marape i tok.

Ol bai gat moa long 10 pesen long dispela projek. Marape i mekim dispela tok long bekim askim bilong Memba bilong Not Flai, James Donald long Palamen Kibung long Tunde dispela wik. Mista Donald i bin laik askim Minista bilong Petrolium, Kerenga Kua, tasol em i no bin stap long Palamen Haus long dispela taim na ol askim i bin go long Marape. Memba i askim long as gavman i no askim o i kisim em o ol lida na ol pipel bilong Westen Provins long stap insait long toktok bilong divelopim P’nyang wantaim divelopa ExxonMobil long Houston, Texas long Amerika i no longtaim i go pinis. Donald i askim tu sapos gavman i bin brukim Oil na Gas lo long kamapim dispela ol toktok na agrimen we em i tok 15 yia taim gavman i givim ExxonMobil Petrolium Ritensen Laisens (PRL 3) long divelopim P’nyang gas fil tasol dispela i no bin kamap na dispela ol taim bilong wok i pinis. Marape i amamas long ol askim na i tokim Memba long putim ol askim long wanpela pepa na salim i go long Minista na em yet olsem tupela i ken bekim gut dispela ol askim long wanpela sindaun bilong ol palamen kibung long dispela taim. Em i tok dispela ol agrimen we Galp Gavana, Chris Haiveta i bin go pas wantaim Minista bilong Petrolium na tu long Jastis Minista, Bryan Kramer long mekim em ol bung bilong gavman level tasol. Em i tok bihain long taim bilong mekim ol Oil na Gas Agrimen Lo, ol bai askim ol lida na papagraun bilong P’nyang long stap insait long dispela ol agrimen. Em i tok gavman i mekim gutpela agrimen we i bihainim ol tingting bilong em long bikpela tok long “Kisim Bek PNG,” aninit long ol wok divelopmen i kamap long kantri. Marape i tok bihainim dispela tingting planti bilong ol bikpela projek olsem P’nyang Gas Agrimen em gavman kisim 61 pesen, PNG LNG Projek em gavman i gat 49 pesen, Papua (51 pesen) na dispela bai wankain long Porgera Gol Main na ol arapela projek olsem timba. “Mi laik strongim tingting bilong Memba na ol pipel bilong Westen olsem mipela i kamapim freim wok long kamapim dispela projek,” Marape i tok. “Taim mi kisim gavman long Me 30, 2019, mi tok olsem P’nyang i no inap go wantaim Papua LNG long taim ExxonMobil i laik bungim tupela wantaim. “Wanem samting yu laik kisim long ol pipel em wankain tingting mipela i gat long ol arapela projek taim mipela i go long sainim dispela agrimen. “Em pablik dokumen tasol taim mipela i go insait long Oil na Gas Agrimen mipela bai askim Provinsal Gavman na ol papagraun long kam insait long agrimen.” Marape i tok tenkyu tu long ExxonMobil long luksave long tingting bilong gavman na sapotim ol wok bilong em.

Paul Zuvani i raitim