BIHAINIM ol hevi bilong COVID-19 we i wok long kamap nau long dispela taim long PNG, Sif Seketeri Ivan Pomaleu las wik i mekim wanpela singaut long ol pablik sevan i mas kisim veksin.

Em i bin salim wanpela pas i go long ol het bilong ol gavman ejensi, ol provinsal edministreta, ol het bilong ol atoriti we gavman i fandim na olgeta pablik sevan, Mista Pomaleu i tok, ol pablik sevan i mas kisim veksin long lukim olsem wok i ken go het yet long dispela taim bilong COVID-19.

“Nesenel Kontrol Senta bilong COVID-19 i tokaut pinis olsem COVID-19, na moa yet Delta Variant bilong en, i wok long kirap bek gen long sampela hap bilong kantri. Dispela i putim bikpela hevi long helt sistem bilong yumi na tu i putim ol medikol franlain woka long mak nogut stret. “Wankain ol piksa i kamap long ol arapela kantri long wol tu tasol planti dispela ol kantri i gat ol gutpela helt sistem. PNG yumi nogat gutpela helt sistem.

“Nau long kantri olgeta medikol fesiliti bilong mipela i bungim bikpela salens we ol i no save lukim long bipo,” Mista Pomaleu i tok. “Gavman long dispela taim i wokabaut long wanpela mak we em i mas was long COVID-19 pandemik na long wankain taim larim ikonomi i ran. “Ol lida bilong mipela i no laik putim moa lokdaun long kantri bikos long bikpela hevi ol lokdaun i bin kamapim long ikonomi na sindaun bilong ol pipel long las tupela yia. Em i tok em i singaut long ol het bilong ol gavman ejensi na dipatmen na ol pablik sevan long ol i mas kisim veksin long banisim ol yet, ol wanwok bilong ol na ol famili bilong ol. “Dispela em i apil i go long gutpela tingting bilong olgeta wan wan man na meri na em i no pusim wanpela long go kisim veksin. “Sapos ol pablik sevan i laik bihainim stia bilong saiens na medikol orait ol i mas lukim olsem dispela ol stia i kam long ol trupela o long ol lain i gat nem long mekim dispela wok. “Nau long dispela taim ol toktok i kam i tok veksin tasol i gutpela rot bilong banisim yumi long COVID-19. “Ol franlain medikol wok manmeri i nidim sapot bilong yumi olgeta long pait egensim dispela pandemik. Yumi kisim veksin em wanpela rot yumi wan wan i ken helpim long daunim dispela sik na larim ol bet long COVID-19 fesiliti i stap fri. Ol dispela bet i stap long ol pipel husat bai i nidim stret,” Mista Pomaleu i tok.