MAN Jiwaka wantaim ol sikispela pikinini i laikim olsem ol saspekt husat i kilim meri bilong em na mama bilong ol pikinini i dai long Madang provins mas kisim det penalti sas.

Jiwaka separet provins woking komiti memba na foma provinsal asembli memba Thomas Galye bilong Jimi distrik i laikim olsem ol saspekt husat i kilim meri bilong em long Septemba 29 long Malala, long 6 kilok avinun mas kisim sas bilong det penalti. “Ol saspekt em ol man Jimi yet. Ol i bihianim meri bilong mi long Jiwaka yet i go long Madang na kilim em wantaim naip. “Meri bilong mi em wanpela mama we i bin stap long baksait na sapotim mi long kisim nupela provins, Jiwaka. “Em i no bin kisim wanpela helpim long provinsal gavman. Nogat luksave na ‘Mama Jiwaka’ nau i lusim laip. “Mi laikim provinsal gavman na provinsal e d m i n i s t r e s e n long mitim olgeta kost na peim olgeta autstending entaitolmen bilong mi. “Polis long Minj na Banz mas wok bung wantaim na arestim ol dispela saspekt na bringim ol i go long han bilong lo. “Mein kalprit mas kisim sas bilong det penelti,” Galye i tok. Em i tok moa olsem ol i luksave pinis long mein saspekt wantaim ol arapela saspekt tasol nau yet ol i ranawe na hait. “Mi apil long ol pablik namel long Bogia na Madang long sapotim polis long painim ol dispela saspekt. “Meri bilong mi em hatwok mama bilong Jiwaka provins na em i no gutpela pasin ol i kisim laip bilong em,” Galye i tok. Ol saspekt i bin gat kros wantaim ol lain bilong Galye bipo na ol i pait na planti laip i bin lus pinis. “Dispela kain longlong pasin bilong ples yumi save bringim i kam long siti em i no gutpela.. Galye i tok.

Hoffman Gulgarye i raitim