I GAT wari na pret nau long Orokolo Bay, Galp Provins olsem soseri i wok long kilim ol pipel long ol ples bilong ol.

Insait long wanpela telepon intaviu wantaim Wantok Niuspepa wanpela kola (Michael, giaman nem bilong kola) i tok, soseri i wok long bagarapim ol ples bilong ol. Em i bin ringim Wantok Niuspepa long tokaut long hevi bihain long brata bilong em I dai long saspek bilong soseri. Michael i tok ol husat i mekim pasin soseri em ol man. Em i tok ol meri i save pret long go long bus o wara ol yet long painim kaikai long wanem ol man ya i save askim ol long slip wantaim ol na sapos ol i les ol man ya i save kilim ol. Michael i tok ol pasin bilong soseri i wok long go bikpela nau wantaim ol divelopmen i wok long kamap long ol komyuniti bilong ol. “Ol i wok long kilim ol pipel i save long histori bilong graun na ples. “Long strongim pasin bilong soseri ol i save kilim ol man o meri na kaikai bodi bilong ol. “Mipela i lukim pasin soseri i suruk i go long narapela level, taim ol i kilim ol man na meri na kaikai bodi bilong ol,” Michael i tok. Em i singaut long ol lo manmeri na ol lida long helpim long paitim pasin bilong soseri long ol ples long Orokolo Bay.

Rosa Koian i raitim