STAT long neks yia Papua Niugini Dipatmen bilong Jastis na Atoni Jeneral (DJAG) bai kisim ol sumatin i pinis long gret 12 na i no kisim ofa long ol koles long wok olsem ol viles kot opisal , Seketeri Dr Eric Kwa i tok.

 Em i tok olsem dipatmen i lukluk long ol viles kot olsem wanpela rot long stretim ol lo na oda hevi hariap insait long ol komyuniti. Dr. Kwa i tok dipatment bilong em i laik givim luksave long ol gret 12 sumatin na dispela bai i helpim long daunim namba bilong ol manmeri i nogat wok insait long kantri. Dr. Kwa i tok olsem gavman i lukluk long stretim na strongim viles kot sistem bilong kantri. “Ol Distrik Kot i save lukautim mak bilong 14,000 keis long wanpela yia na nesenel kot long mak bilong 13,000 keis.” “Bikos ol viles kot i kisim moa namba bilong ol keis, ol nidim gutpela sapot. “Long stat bilong 2022, gavman bai kisim ol gret 12 olsem ol pis opisa na kuskus long sevim ol 1,670 viles kot bilong yumi. “Mipela (DJAG) nidim ol infomesen na mipela nidim ol data, olsem na mipela nidim ol manmeri husat i pinisim sampela mak bilong skul. Long ol wan wan viles kot eria, mipela nidim foapela pis opisa olsem na taim yumi kauntim foapela taim wantaim 1,670, em i bikpela namba tumas. “Tingting bilong mipela em long trenim dispela ol manmeri. “Taim ol dispela ol gret 12 skul liva i joinim dispela viles kot sistem, mipela i ken putim ol i go long wokim diploma o digri program na ol i ken lusim mipela bihain long faivpela yia, na mipela bai kisim neks nuipela gret 12 sumatin. DJAG i nau lukluk long ol patna husat i ken divelopim wanpela program bilong mipela long muvim i go long ol viles kot opisal bilong yumi long kisim ol skul kos we dipatmen bilong Jastis na Atoni Jeneral bai fandim.