SIR Robert Kynnersley Woods CBE wanpela jas bipo bilong Papua Niugini nesenel na suprim kot i dai long Australia long las mun.

Leit Jastis Woods i bin gat 81 krismas taim em i dai. Mama i bin karim em long 1939. Taim em i stap long Papua Niugini em i bin helpim long raitim mama lo bilong Papua Niugini bipo long PNG I kisim independens. Em i bin wok long PNG judisieri long 30 krismas olgeta stat long 1970 i go inap 2000. Long 1982 em i kamap jas na i holim dispela wok inap 1999.

Em i bin go bek long Australia long 2001 na kamap jas long distrik kot bilong New South Wales na holim dispela wok inap 2012. Em tu i bin givim planti taim bilong em long helpim wok bilong Scout Asosiesen bilong Papua Niugini na Pasifik rijon. Long PNG em i helpim olsem komisina bilong Scout Asosiesen bilong PNG na em i ranim planti trening bilong ol scout komisina long planti yia. Em i raitim tu ol planti trening buk bilong ol scout. Em i raitim tu ol polisi, ol rul, ol seifti stia na ol buk bilong ol lida bilong ol scout. Leit Jastis Woods i bin kisim luksave long wok bilong em wantaim ol scouts long PNG na long Pasifik tu. Long 2000 PNG i bin luksave long em na givim Kumul Awot na long 2001 em i bin kisim  Asia-Pacific Rijinol Scout Konperens Siaman Awot.