OL mama na ol meri long Sabama long Mosbi Saut ilektoret, NCD i bin holim bung bilong ol na i bin gat bikpela amamas las wik. Dispela bung i bin kamap bihain tasol long independens long 24 Septemba. 

Minista bilong Spots na Open Memba bilong Mosbi Saut Justin Tkatchenko i bin stretim wari bilong ol taim em i bin givim wan wan sek mani long mani mak bilong K20,000 i go inap long K30,000 long ol 16 SME asosiesen bilong ol meri long Sabama. Wan wan asosiesen i soim bikpela amamas tru long wanem dispela tingting bilong lokal memba long sapotim na kirapim wok bilong SME long  Sabama komyuniti em bai kamapim gutpela sindaun bilong ol. Planti mama i rausim bel wari bilong ol na i lusim aiwara tu long wanem ol i no save gut long rit na rait na laip bilong ol insait long siti i save hatwok tumas. Wanpela mama i rausim bel wari bilong em na i tok,  “Em i no wanpela isipela wok long lukautim pikinini taim yu nogat wokmani na taim yu stap insait long setelmen.” Kaunsil meri na komyuniti lida bilong Sabama, Medlyn Thomas i tok, “Long kamapim gutpela sindaun bilong ol pikinini ol mama i save hatwok tru long maket na ol i no laikim tru pikinini bilong ol i bihainim wankain rot olsem ol na i mas kamap gut na gat gutpela laip long taim bihain. Na dispela mani we memba i givim bai i helpim gut tru ol mama na ol meri insait long dispela ol SME asosiesen long kirapim na mekim ol wok bisnis bilong ol na lukautim sindaun bilong ol yet, famili na komyuniti bilong ol. Hetmeri na lida bilong wanpela bilong dispela ol 16  Asosiesen Toru Guken i bin soim bikpela bel amamas tu long dispela taim na em i tok, “Dispela mani bai helpim mi long kirapim moa liklik bisnis bilong mi na tu bai i ken senisim laip bilong famili bilong mi.” Memba bilong Mosbi  Saut Justin Tkatchenko tu i bin tok bikpela amamas long ol meri long Sabama komyuniti long ol yet long strong bilong ol yet i kamapim na mekim dispela wokabaut bilong kirapim wok SME. Long wankain taim em i tok tenkyu long gutpela tingting na bel isi ol i soim taim em i wok long surukim taim bilong dispela bung. “Dispela pasin mi soim long sapotim wok SME bilong ol meri long komyuniti bai i mas kamap gutpela na i go bikpela moa yet,” Mista Tkatchenko i tok. Insait long ol mun i kam, Mista Tkatchenko bai i wok strong yet long kirapim ol SME program long ol arapela komyuniti insait long ilektoret bilong em.

Paul Oeka i raitim