DIVISEN bilong ol pawa na fansen bilong gavman sistem nid long mekim klia wanem wok na risponsiliti bilong ol long sevis diliveri long ol pipel. Dokta Thomas Webster bilong Papua Niugini Nesenel Rises Institut (PNGNRI) i mekim dispela toktok long mekim klia sampela tingting bilong Atonomi na Disentralaisesen risets projek em i go pas long en.

Tasol long namba 4 semina Sekreteri bilong Konstitusenal Lo Rifom Komiti (CLRC) Dokta Mange Matui i tok CLRC i wok long traim mekim

sampela senis long impruvim sistem. Dokta Matui i tok i luk olsem 30-50 yia long sistem i senis inap long sampela krismas bihain long indipendens. Em i tok problem wantaim sistem bilong nau em i olsem yumi gat ol lain bilong mekim disisen long olgeta level bilong gavman tasol ol i no inap karimaut ol dispela disisen bilong ol. “Yumi gat politisen long nesenel level, wankain tu long provinsal level na lokal level gavman long mekim kamap tru ol dispela disisen bilong ol. “Inap yumi givim sampela speis bilong kamapim ol dispela wok? “Lukluk klostu long sistem bilong nau yumi gat. Yumi inap givim spes long mekim sampela wok i kamap na i no long provaidim sistem yumi gat nau,” Dokta Matui i tok. Em i tok planti revenyu jenereting sistem em i besik tasol bilong kisim long ol provinsal gavman em nau yumi wok long yusim i stap. “Wanem samting yumi mas mekim em long kamapim sistem bai inap wok long wanpela o tupela rot tasol,” em i tok. Dokta Matui i tok ripot bilong CLRC i fokas moa long isu bilong provinsal disentralaisesen na ripot i tok long wan wan provins mas i gat rait bilong mekim disisen bilong ol yet long kisim atonomi bilong ol yet. “Long kisim atonomi bilong ol yet na mekim disisen bilong ol yet long jeneretim revenyu bilong ol long kamapim wok insait long ol provins bilong ol. “Mi ting dispela em i nupela rot kantri bai inap bihainim. Yumi mas lukluk long bihainim nupela daireksen nau,” Dokta Matui i tok. Namba faiv semina bai kamap long Nesenel Rises Institut (NRI) long Oktoba 19, 2021.

Joseph Dawai i raitim