WOK painimaut bilong Papua Niugini (PNG) Nesenel Risets Institiut i tokaut olsem Voluntary Customary Land Registration (VCLR) sistem i bin kamap bilong strongim ol papa graun long rejistaim ol kastomari graun bilong ol na putim long lis bilong divelopmen.

Ripot i kam long Sastenabol graun Divelopmen Program opisa, Logea Nao i tok olsem em i impoten tru long ol kastomari graun i mas i joinim fomal maket na ol papa graun i mas wok wantaim long fomal na ligal trenseksin bilong hau long yusim ol graun bilong ol. Em i tok tude kastomari graun we i stap long VCLR sistem i no wok long mekim mani bikos long ol kain kain hevi bilong papa graun na edministresin.

“Sapos yumi laik mekim lis kastomari graun long mekim mani, gavman i mas lukluk long rot bilong daunim pasin bilong pait long graun na katim daun ol kost na step bilong rejistaim graun na impruvim taitol bilong rejistresin na menesmen bilong graun,” em i tok. Mis Nao i tok dispela  rot bai givim konfidens long ol lenda long apim dinao na givim sans long ol bisnis na invesmen long gro na kamapim moa wok, apim reveniu bilong gavman na tu ol papa graun i ken benefit. Dispela rot tu bai lukautim gut ol kastomari graun na pasim pasin bilong pait long graun. Dispela wok painimaut ripot bilong andastenim hau kastomari graun lis i ken mekim mani long PNG bai kontribiut i go long diskasen bilong kisim bek onasip bilong kastomari graun na givim aut bilong kamapim divelopmen long kantri.