PRAIM Minista James Marape i salim tok sori bilong em long dai bilong Sir Pita Lus na Sir Silas Atopare long las wik. Em i salim tok sori long famili bilong ol bihain long em i kam bek long kantri long wokabaut bilong em i go long Amerika long las 10-pela de.

Em i tok em i sori long harim planti lain husat i dai em ol lida na husat em i ken lain long ol. Marape i yusim dispela taim long askim ol manmeri long was long ol yet long sik coronavirus (COVID-19). Em i askim ol long kisim veksinesen. Sir Pita i bilong Maprik, Is Sepik Provins na i bin stap Memba bilong Palamen moa long 30 krismas. Mista Marape long 16 Septemba i bin go long Maprik long lukim na soim rispek long wok bilong Sir Pita olsem strongpela politik man na wanpela “Papa” bilong kantri. Em i no bin save olsem bihain tasol long dispela Sir Pita bai lusim laip bilong em long las wik Fraide long Maprik. Sir Silas husat i bilong Isten Hailans i bin dai long 16 Septemba long taim kantri i amamasim 46 Independens Anivesari bilong em. Em i bin stap namba 7 Gavana Jeneral bilong Papua Niugini long 1997 i go long 2003.