PAPUA Niugini Ilektoral Komisin (PNGEC) i plen long stretim ol ilektoral komon rol long liklik taim bihain. PNGEC ekting Komisina Simon Sinai i no tokaut klia long de dispela wok bai kamap tasol em i tok Komisin i redi long karimaut dispela wok.

Em i tok long neks yia Janueri, Februeri na Mas, ol ilektoral rol i mas redi long Komisin i ken yusim long neks Julai Jeneral Ileksen. Em i mekim dispela tok long wanpela pres konprens long Pot Mosbi long las wik. Em i tok 2017 komon rol i gat inap infomesen long data bes na 2019 kaunsil ileksen rol I gat data bes long mekim dispela wok. “Dispela ol data bes em ol legal data bes bilong mipela,” Sinai i tok. “Ol manmeri husat i gat planti tingting long dispela data bes bai askim sapos on I tru o nogat. Sinai i tok ol apdeit Komisin bai mekim long ol provinsinal vota tasol, em long ol lain husat krismas bilong ol i 18 bihain long 2017 Jeneral Ileksen. Ol bai mekim ol apdeit long ol lain husat i lusim wanpela ples na i go stap long narapela ples na i stap long dispela ples moa long 6-pela mun. “Dispela em ol taget grup bilong mipela. Dispela em tupela wari tasol em mipela i gat long em. “Komonrol em i bikpela samting long olgeta ileksen. Taim mipela i no gat ilektoral rol, mipela i no inap long ranim ileksen. “Beis rol i stap, mipela i mas mekim liklik apdeit tasol.” Sinai i tok apdeit inap kamap insait long 6-pela mun. Em i tok gavman i givim em K40 milien na em bai skelim K5,000 long wan wan ol wod kaunsil eria na ol kaunsil na lokal level gavman bai helpim long mekim apdeit. Em i tok ol i trenim pinis ol ilektoral menesa na ol i redi long mekim apdeit insait long wanpela mun tasol.