PRAIM Minista James Marape i kam bek pinis long raun bilong em long ovasis. Long dispela wokabaut em i bin stap long bikpela klaimet senis bung bilong United Nations long New York, USA long Septemba 21- 24.

Taim em i kam kamap long Jacksons Ples Balus, Pot Mosbi, em i bin tokaut olsem em i amamas long dispela wokabaut. Long New York em i bin stap long bikpela bung bilong ol het bilong ol gavman na bihain em i bin i go long Houston long toktok long agrimen bilong P’nyang Gas. Long dispela taim tu em i toktok long baim ikwiti HOA wantaim ExxonMobil. Em i bin bung tu wantaim Sif Ekseketiv Opisa bilong Barrick Mark Bristow na tim bilong em na stretim sampela toktok we i stap yet long mekim bai Porgera Main i ken stat wok gen hariap. Mista Marape i amamas tu long toktok bilong em long dispela namba 76 United Nations General Assembly. Em i tok long dispela asembli em i toktok long hevi bilong COVID-19 long PNG na klaimet senis we I stap longpela taim pinis. “Mi toktok long dispela tupela bikpela samting na tu ol arapela hevi olsem jenda ikwaliti na givim apdeit long Bogenvil. Mi toktok tu long pis na human rait isu long PNG na Indo-Pasifik rijon bilong yumi. “Em i namba wan taim bilong mi long givim toktok long United Nations General Assembly na i bin go aut long televisen,” Mista Marape i tok. Praim Minista Marape i kam bek tu long taim we planti indai i wok long kamap long kantri. Namel long ol tupela senia stets man, Sir Sailas Atopare na Sir Pita Lus i indai. Mista Marape i givim bikpela tok sori bilong em.