NU Ailan Gavana Sir Julius Chan i bung wantaim ol arapela manmeri long kantri long salim tok sori bilong em i go long dai bilong wanpela “Papa” bilong kantri.

Dispela man em Sir Pita Lus husat i bin stap longtaim Memba bilong Maprik, Is Sepik bipo long Independen na bihain long Independens. Sir Julius i sori tru long harim dai bilong dispela gutpela politikal poroman long taim em i bin redi long opim autpesen wing bilong Tinkoris Rurel Haus sik long Matalai LLG long Namatanai distrik long las wik. “Mi save gut tru long Sir Pita, husat i wanpela bilong ol man i pait long kantri long kisim Independens,” Sir Julius i tok. “Wanpela strongpela man long pait long lukaut bilong Mama Lo. “Em i bikpela sori long harim dai bilong em. “Sir Pita i dispela man husat i askim Sir Michael long kamap politik man long taim Sir Michael olsem redio man. “Bihain long dispela, Papua Niugini i save long histori.” Sir Julius i tok wanpela bikpela samting long Sir Pita em long pasin bilong em long tokaut na tok stret long ol samting i bikpela long laip. “Mi ken save olsem planti taim long Nesenel Palamen, Sir Pita i save mekim ol toktok we i save kirapim bel na tingting bilong ol Memba. Em i mekim palamen olsem ples bilong skelim tingting na ol toktok, pasin we i wok long lus isi isi long dispela taim.” Sir Julius i salim tok sori bilong em, famili na ol pipel bilong Nu Ailan i go long Ledi Lus na famili bilong em. Em i hop olsem meri bilong Sir Pita bai save olsem man, papa na bubu papa bilong ol i mekim bikpela wok long lukim Papua Niugini we i kamap olsem nau em i stap. Sir Pita Lus i wanpela long ol man long helpim long kamapim Mama Lo, Independens bilong kantri na i sanap strong long taim kantri i bungim ol salens.