NARAPELA strongpela kwila bilong Is Sepik, Sir Pita Lus, i bin dai long 1 Oktoba long Maprik. Sir Pita i bin dai sampela wik bihain long em i bin selebretim 86 krismas bilong em wantaim ol pipel bilong Papua Niugini long 16 Septemba.

Anna Solomon i raitim

Praim Minista James Marape i bin go stap long Maprik wantaim Sir Pita long makim dispela bikpela de bilong kantri.

Bodi bilong Sir i stap nau long Pot Mosbi. Bihain bai ol i kisim i go bek na planim em long Maprik yet. Mama i bin karim Sir Pita long ples Lehinga, Maprik distrik long 16 Septemba 1935. Sir Pita i bin memba long namba wan Haus ov Asembli long 1964 we em i bin makim Drekikir Open Ilektoret. Bihain long 1968 ileksen, em i bin resis long Maprik Open na i win na em i holim dispela sia 7-pela taim olgeta inap 38 yia na em i pinis long 2002.

Kwin Elizabeth i bin luksave long wok bilong Sir Pita na i givim em dispela namba “Sir” long 1979. Long taim Michael Somare na ol narapela yangpela lida olsem Albert Maori Kiki, Oala Oala Rarua, Joe Nombri na Vin Tobainig i bin kirapim Pangu Pati long Jun 1967, i bin gat 9-pela memba bilong Pangu Pati long Haus ov Asembi. Ol dispela memba em Sir Pita Lus, Nicholas Brokam, Barry Holloway, Wegra Kenu, Siwi Kurondo, Paul Lapun, Paliau Maloat, James Meanggarum na Tony Voutas. Sir Pita i bin grisim Sir Michael long go insait long wok politiks long dispela taim Sir Michael i bin wanpela redio brokas opisa long Redio Wewak.

Em i kempen strong long Sir Michael long 1968 ileksen na Sir Michael i bin winim sia bilong Wewak. Sir Pita Lus i bin skul inap long mak bilong gret 4, tasol em i wanpela trupela lida bilong pipel. Em i laik kamapim senis na lukim ol pipel bilong PNG yet i ranim kantri. Olsem na em i sapotim ol yangpela lida olsem Sir Michael Somare husat inap long mekim wok bilong bringim kantri i go long mak bilong selp gavman na independens.

Long taim Sir Pita i bin stap long Palamen long 38 yia, em i bin holim planti wok bilong minista long gavman bilong Somare na i bin makim PNG long ol bikpela miting long ol ovasis kantri.

Sir Pita i gat nem olsem wanpela memba bilong Palamen (MP) husat i save opim maus oltaim na stopim dibet long plua bilong Palamen. Em i no save wari long husat MP i toktok. Sapos em i pilim olsem ol toktok i krangki liklik bai em i kirap sanap na autim stret Tok Pisin bilong em. Planti taim Spika bilong Palamen i save hetpen long kontrolim Sir Pita Lus. Ol Hansard rekot bilong Palamen bai soim ol toktok bilong Sir Pita.

Kala bilong Sir Pita i no stap long toktok bilong em tasol long Palamen. Nogat. Em i bin namba wan MP long soim kalsa bilong PNG long bilas bilong em. Long taim bilong Palamen, Sir Pita i save dresap gut tru long sulu na jaket na kauboi hat bilong em na hangamapim bikpela tit bilong pik long nek. Em i statim dispela stail na bihain ol arapela MP tu i stat long bihainim.

Long 16 Septemba long dispela yia, Sir Pita Lus i bin toktok long bikpela selebresen long Maprik taun na em i tokim ol pipel long putim God i go pas, stopim pasin bilong pait, na wok bung wantaim.

Em i tok jeneresen bilong em i bin pait long winim independens bilong kantri, olsem na tude i no gat as bilong ol pipel i pait nabaut. I tru olsem Sir Peter Lus i go pinis nau. Tasol hanmak bilong em bai stap oltaim long PNG bikos dispela de 16 Septemba, em i betde bilong PNG na em i betde tu bilong Sir Pita.