WOK bilong painimaut moa long indai bilong wanpela Minista bilong Atonomus Bogenvil Gavman (ABG) bai stat long Mande 1 Novemba 2021.

Bot bilong ol i bin lus long solwara namel long Buka na Nissan Ailan. Senia Provinsal Mejistret long Bogenvil, Bruce Tasikul bai i go pas long dispela Koronial Inkwes. Mista Tasikul i tok ol i bin wetim mani i kam long ABG long kisim ol witnes long Nissan ailan na sampela arapela hap long kam long dispela Koronial Inkwest. Em i singaut long ol pipel husat i gat infomesen long kam na toktok wantaim korona na i no ken tokwin nabaut long rot. Mista Tasikul i tok olgeta witnes i mas kamap long Buka long pinis bilong mun Oktoba na bai dispela inkwes i ken stat. Em i tok klia olsem inkwes i no gat pawa long tok wanpela man i brukim lo na kalabusim em. Korona i gat pawa long mekim wok long painimaut wanem as tru bilong ol dispela pipel i lus nating long solwara. Em i tok sapos ol i painimaut olsem wanpela asua i kamap, bai huat lain i brukim lo i kamap long kot.