POLIS na PNG Kastoms long Pot Mosbi i bin mekim wanpela spesel operesen ol i kolim Saki Bomb na ol i arestim wanpela man Australia long wiken.

Dispela man, Sean Anthony Honey i gat 31 krismas. Polis ripot i tok ol i bin kisim warent na sekap long haus bilong Honey long Mosbi Not Wes we ol i bin painim sampela drag ol i kolim methamphetamine, wanpela pistol, sotgan na ol katres. Polis Komisna David Manning i tok  ol polis i no inap long tokaut yet long hamas drag ol i painim. Tasol em i tok dispela i wanpela ‘controll delivery’ we ol drag i bin kam long ovasis kantri na ol polis i kisim ripot na holimpas ol lain husat bai kisim dispela drag long taim em i kamap long PNG. Honey i baim kot beil na i kam ausat na wetim kot bilong em.