OL KAMPANI  husat i wok long infrastraksa divelopmen long Madang taun i wok long sutim tok long ren na weda olsem dispela i pasim ol long i no wok hariap na i no wok gut.

I no long taim i go pinis Nesenel Eapot Koporesen (NAC) i bin surikim taim long opim gen Madang Eapot bihain long wok ekstensen i kamap long ples balus. Dispela ol i tokaut i kamap bikos long ren na weda i no orait long ol wok lain i wok na pinisim wok long taim stret. Tude wok i orait pinis na ol liklik balus tasol olsem Dash 8 bilong Air Niugini i stat ran gen. Tasol wanpela komyuniti lida bilong ples Gum long Saut Ambenob LLG, Tau Hans i tok dispela i no mas tru. Em i tok ol lain kontraka i no gat save long mekim wok gut na dispela i lukim wok long ol infrastraksa long Madang taun i wok long

ran isi isi. Wantaim wok bilong stretim ples balus, hevi bilong wokim gut ol rot long taun na baret i stap yet. Wok bilong Madang taun rot em Minista bilong Jastis na Atoni Jeneral na Memba bilong Madang, Bryan Kramer i tok em laik lukim ol wok lain i stretim gut rot klostu long rotbung bilong Baidal Rot na Modilon Rot i go long Madang taun. Kramer i tok wok bilong stretim gut baret bai helpim long lukim olsem rot long Madang taun olgeta taim i no ken bagarap. Em i tok pastaim olsem ol  masin bilong wokim wok long stretim Madang taun rot bai Madang Distrik Divelopmen Atoriti bai i baim na bringim i kam long ovasis. Tasol tude nogat ol nupela masin i kam na Madang DDA i wok long haiarim ol masin bilong Woks Dipatmen, na long las tripela wik i go ol i haiarim masin bilong HBS. HBS em kontrak kampani we Nesenel Eapot Koporesen (NAC)i  bin givim kontrak long ol long stretim na kamapim nupela divelopmen long Madang Eapot o ples balus. Haiarim ol kontrekta i gutpela tasol dispela i no go gut wantaim sampela as ples lain. Wanpela bilong em Hans.

Em i askim long wanem rot tru Madang DDA i kalapim ol lokal kampani bilong Madang na i kisim ol masin bilong HBS long wok long Madang taun rot. Em i tok strong olsem tude long Madang taim strongpela san i lait das i save bagarapim tru ples na manmeri i gat hevi long pulim gutpela win.

James G. Kila i raitim