KATOLIK Bisop Konprens long Pot Mosbi i bin karim aut wanpela awenes long lukautim pikinini long Wes Papua kem long Renbo, Pot Mosbi las wik. Moa long 50 famili bin stap long dispela awenes bung.

Dispela em i namba wan kain awenes olsem i kamap aninit long Rait Rilesensip Ministri bilong Katolik Bisop Konprens bilong PNG na Solomon Ailan. Dispela bung i bin kamap wantaim wok bung bilong komyuniti na lida bilong ol Olaf Wayangkauw. Insait long dispela awenes ol famili i kisim ol toktok bilong husat em i pikinini na wanem wok bilong ol mama na papa long helpim ol i gro gut long bodi (fisikel), long tingting (mental) na long spirit. Ol i lainim tu olsem ol pikinini i gat nid tu na ol mamapapa i mas inapim dispela ol nid bilong ol. Ol i kisim toktok bilong was gut na banisim ol pikinini long ol birua we i ken bungim ol. Awenes tim i tokaut olsem ol pikinini i save bungim hevi long famili, long ol pren, ol neiba na envairomen oliI stap long en. Dispela ol hevi i save gat impek long laip bilong ol tai mol ol gro i go bikpela man na meri.