OPOSISEN lida Belden Namah i tok Marape-Gavman i stap  long opis moa long tupela na hap yia tasol i no pinisim wanpela wok. Em i tok long em mas pinisim ol projek, gavman i wok long launsim ol kopret na stratejik plen.

Em i mekim dispela tok bihain long Praim Minista James Marape i launsim Nesenel Fiseris Stratejik Plen long las wik Trinde. Em i no amamas long mani gavman i mas yusim long helpim ol lokal pis fama em gavman i yusim long edvetaisim dispela plen long ol midia. “Ol pipel bilong Papua Niugini i no laikim ol plen long wanem samting bai kamap,” Namah i tok. “Ol i laikim wok tru i mas kamap. Ol lokal pis fama i wok long painim rot long kisim pis. Ol i painim rot long salim pis na sapotim ol yet tasol gavman i wok long yusim mani long tokaut long ol plen bilong em. “Yu laikim gavman i tingting long ol manmeri na mekim ol wok we ol pilim stret. “Nogut mi krangki, tasol gavman i mas kamaut na tokaut long wok ol i kamapim we ol pipel i pilim stret olsem ol i kisim sevis. Namah i tok inap long dispela taim gavman i wok long kamapim ol tok win tasol. Em i tok gavman i bin save kisim gutpela mani long ekstrektiv indastri (maining na petroleum eksploresen wok) tasol nau i no gat. Em i tok no gat wanpela eksploresen wok i kamap olsem kantri i ken save wanem ol bikpela impek projek i stap bilong strongim kantri long bihain taim.