OPIS bilong PNG Ilektoral Baundri Komisin i tok bihainim ol Seksen 37(1)(2) bilong Ogenik Lo long Nesenel na Lokal Level Gavman Ileksen (“Ogenik Lo”), Komisin i tokaut long wok painimaut em i bin mekim long Julai 4 i go long Julai 23, 2021 long em i mas toksave long pablik long stap bilong ol Open ilektoret we i stap nau.

Em i tok bihainim sabmisin em i bin kisim long taim bilong Pablik Konsaltesen long ol provins, daunbilo em ol tingting bilong kamapim ol nupela Open Ilektoret em i bin kisim long wok painimaut. Ol tingting bilong kisim ol nupela ilektoret i stap olsem. Long Sauten rijon dispela em ol ilektoret: Rabaraba long Milen Provins i laik bruk lusim Alotau ilekoret na kamap ilektoret bilong em yet; Popondetta (Noten Provins) i laik bruk long Ijivitari ilektoret; Delta Flai (Westen Provins) long Midel Flai; Kaintiba (Galp) long Kerema; na HiriKoiari (Sentral) long Kairuku Hiri ilektoret. Long Niugini Ailan rijon: Is Manus na Wes Manus i laik bruk long Manus Open Ilektoret na kamap tupela ilektoret bilong ol yet; Konos (Nu Ailan) i laik bruk long Namatanai; Baining (Is Nu Briten) long Gazelle; na Nakanai (Wes Nu Briten) long Talesea. Long Momase rijon: Green River (Wes Sepik) laik bruk lusim Vanimo-Green Open na kamap ilektoret bilong em yet, Lumi (Wes Sepik) long Aitape-Lumi; Midel Sepik (Is Sepik) long Angoram; Madang Rurel (Madang) long Madang; na Wau-Waria (Morobe) long Bulolo, Lae Wes long Lae na Lae Is long Lae Open ilektoret. Long Hailans Jon 1: Komo Hulia (Hela) i laik bruk lusim Komo

Magarima Open, Obene long Komo-Magarima; na Anglimb Kuli (Jiwaka) long Anglimb Saut Waghi, Kambia long Anglimb Saut Waghi. Long Hailans Jon 2: Mendi Loua na Mendi Eben (Sauten Hailans) i laik brukim lusim Imbonggu; Karints Lai Veli long Mendi, Kutubu Bosavi long Nipa Kutubu Open; na Porgera Paiela (Enga) long Laiagap-Porgera, Laiagap Mulitaka long LaiagapPorgera. PNG ilektoral Baundri Komisin bai raun long wan wan ol provins, makim ples na de bilong kisim ol tingting na toktok bilong ol manmeri. Taim bilong mekim na kisim ol toktok bai stap namel long 8:00 moning na pinis long 4:00 apinun. Yu ken kisim moa ol toktok long dispela ol hap, Opis bilong Siaman bilong Ilektoral Baundri

Komisin; Opis bilong Ilektoral Komisin long Frangipani Street, Hohola, Nesenel Kapital Distrik; Provinsal Hetkwata long wan wan ol provins we toktok bilong nupela ol ilektoret bai kamap long em; na ol Lokal Level Gavman opis we dispela toksave bai mas kamap long em. Komisin i tok bihainim Seksen 37(2) bilong Ogenik Lo, Siaman bilong Komisin na ekting Komisina bilong PNG Ilektoral Komisin, Simon Sinai i askim ol manmeri na ol grup we dispela toktok i pas long ol long ol i mas kamap long pablik inkuari na tokaut long as ol i sapotim o i no sapotim tingting bilong kamapim nupela ilektoret. Pablik i gat foapela wik na mekim fomal toksave long tok orait bilong ol o long go egens bilong ol long dispela ol tingting. Dispela de i stat long Ogas 30 i go inap long Septemba 2021.