GAVANA bilong Sauten Hailans, William Powi i tok em i amamas long disisen bilong Suprim Kot long tok orait long em i mekim apil.

Em i mekim dispela tok long taim Nesenel na Suprim Kot jas, Jastis Les Gavera-Nanu husat i bin wanpela jas tasol long Suprim Kot i bin sindaun na skelim kot bilong em long dispela wik. Jastis Gavera-Nanu i bin mekim disisen bihain long em i skelim sampela tok long disisen bilong saspendim na rot kot i bihainim long kamap wantaim dispela disisen i gat planti tingting. Em i mekim disisen olsem apil kot bilong Powi i ken go long Suprim Kot. Suprim Kot bai skelim sapos rot Nesenel kot i bin yusim na disisen em i mekim long 24 Ogas, 2021 i stret. Jastis David Cannings i bin sindaun olsem Nesenel Kot na i bin yusim zoom video long Australia long mekim disisen bilong saspendim Powi. Long wankain taim, Powi i askim ol manmeri, moa yet long ol pablik sevan long Sauten Hailans long go het long wok bilong ol. “Nomal wok bilong ol manmeri mas go het gut na bel isi i mas stap long provins,” Powi i tok. “Mi bai go bek long Sauten Hailans na kamapim wanpela (provinsal) asembli kibung long strongim tingting bilong manmeri na bringim bek pis na oda long komyuniti. “Mi tok tenkyu long olgeta sapota bilong mi husat i stap long Sauten Hailans olsem, Suprim Kot i kam insait na bai lukluk na skelim gen dispela disisen bilong Nesenel Kot. “Ol tok long saspensen bilong mi, wet inap long Suprim Kot i harim. “Insait long dispela Suprim Kot (apil) aplikesen, (mi laik save) sapos dispela disisen (bilong Nesenel Kot) long saspendim mi i kamap insait long wanpela kot haus long Pot Mosbi o Mt Hagen o long wanpela kot haus. “Dispela long wanem long ol kot haus, ol i mekim disisen na givim jastis?” Suprim Kot yet bai makim de bilong harim dispela apil. Dispela kot bilong “Court of Disputed Return” em Sauten Hailans 2017 Rijonal sia ranap kendidet Pasto Bernard Peter Kaku i bringim egens long Powi olsem em i no Gavana bilong provins. Em i askim Kot long PNG Ilektoral Komisin i mas kaunim gen ol vot na painimaut husat i gavana bilong provins. Em i tok paul pasin i bin kamap long taim bilong kaun na dispela i mekim Powi i win.