PRAIM Minista James Marape i laikim na sapotim “Limited Preferential Voting” (LPV) sistem long ol jeneral na lokal level gavman ileksen.

Em i tok dispela i moa demokratik na i makim moa long 50 pesen bilong ol lain manmeri husat i vot long wanpela ilektoret. Em i mekim dispela tok long Nesenel Brodkasting Kopresen (NBC) Tok Bek So long Mande nait. Em i tok LPV i moa gutpela long “First Past the Post” (FPP) we kendidet husat i win, planti taim i save makim tasol 5 pesen bilong ol manmeri husat i vot long em. Marape long pastaim palamen kibung i bin tokaut palamen i wetim wok painimaut ripot em wanpela Palamenteri komiti we Memba bilong Henganofi, Robert Atiyafa i bin go pas long em long dispela yia. Em i tok taim palamen i kisim dispela ripot em bai inap long tokaut long wanem vot, sapos em i Fes Pas “the” Pos (FPP) sistem o Limited Preferential Voting (LPV)

Sistem ol bai yusim. FPP sistem em i olsem manmeri bai putim mak arere long poto na nem bilong kendidet ol i laikim long em. Long taim bilong kaunim vot, husat kendidet i kisim bikpela namba long wanpela taim tasol bilong kaun i kamap olsem wina bilong ilektoret long dispela ileksen. Long LPV sistem, Komisin i givim sans long manmeri long tripela kendidet em laikim long em. Sapos kendidet man o meri i laikim tru, dispela em bai putim namba 1 arere long poto na nem bilong em. Dispela bai wankain long mak em bai putim long namba 2 na namba 3 kendidet em i laikim long em. Long taim bilong kaun, ol bai kaunim olgeta vot bilong ol kendidet na rausim isi isi ol kendidet husat i no kisim gutpela vot inap long ol i painim kendidet husat i wok long winim namba na i stap yet long kaun na tokaut long laspela kendidet i stap yet olsem kendidet i wina bilong ilektoret long ileksen. Dispela em tupela voting sistem,

FPP na LPV. Marape i tok long save long wanpela sistem dispela komiti i go raun pinis na mekim wok painimaut na ol i ken tokaut sapos sistem isi na i daunim ol hevi i pas long ileksen olsem ileksen i mas kamap fri na fea. Em i tok tu olsem gavman bai bungim Komon Rol, Ilektoral Rol na Nesenel Aidentifikesen Kad (NID) sistem wantaim long 2022 long edresim isu bilong Jeneral Ileksen. Em i tok bikos long hevi bilong coronavirus (COVID-19) gavman i surukim dispela ol wok i go long arere bilong 2022. Tingting bilong yusim wanem sistem sapos em LPV na FPP i stap olsem Praivet Memba Bill em Memba bilong Gumine, Nick Kuman i bringim. Palamen bai vot long dispela Bil long neks wik Palamen kibung we bai stat long Septemba 7 na i go na tokaut long em. Moa long 74 Memba bilong Palamen i mas vot long lukim dispela i kamap lo.

Paul Zuvani i raitim