LONG Mande dispela wik em i namba 20 yia aniveseri bilong Bogenvil Pis Agrimen (BPA) we pipel bilong Bogenvil i bin sainim wantaim gavman bilong Papua Niugini  long Ogas 30, 2001.

Dispela agrimen i bin fomoli pinisim Bogenvil Kraisis na kamapim bel isi namel long pipel bilong Bogenvil na Papua Niugini gavman. Atonomus Bogenvil Gavman Presiden Ishmael Toroama i tok, “Dispela pis agrimen i pasim wanpela taim nogut stret long histori bilong Papua Niugini na Bogenvil. BPA i kamapim faundesen bilong pis na opim rot bilong Bogenvil long go het wantaim driman bilong em long painim rot bilong em yet (selfdetermination).” Long las 20 yia ol pipel bilong Bogenvil na gavman bilong ol i soim laik na komitmen bilong ol long BPA. “Wokabaut bilong mipela long kisim politikel independens, oltaim em i stap insait long banis bilong Bogenvil Pis Agrimen. “Komitmen bilong mipela i givim strong long proses aninit long BPA na mipela inap mekim kamap ol rikwaimen bilong tripela pos bilong BPA. Ol tripela pos em; Atonomi, Wepens Disposal o rausim ol gan bilong pait, na referendum. “Mipela i winim pinis atonomi na mipela i rausim tu ol gan. Na tu mipela i holim pinis wanpela referendum we bikpela namba tru bilong ol pipel, 97.7 pesen, i soim laik bilong ol long Bogenvil i mas kamap wanpela indenpenden soveren stet. “Nau mipela i amamas long wokmak bilong mipela long winim ol samting mipela i wanbel long en insait long BPA. “Long narapela faivpela yia i kam em i kritikel long wanem ABG i tokaut pinis long sanap bilong en long nesenel gavman na i makim taim namel long 2025 na 2027 long Bogenvil i mas kisim independens. “Mi tok tenkyu long Praim Minista James Marape na nesenel gavman long komitmen bilong ol long mekim kamap ol wanbel i stap long BPA, na mipela i kamap long dispela mak nau insait long spirit bilong pren na ikwal patna. “I gat yet sampela samting mipela i mas mekim yet olsem ol rot bilong skelim mani, pawa na wok bung long mekim riviu long atonomi. “Bihainim dispela ol tok mi luksave long Join Supavaisori Bodi olsem stretpela rot nap les bilong toktok long dispela ol samting,” Presiden Toroama i tok.