Ekting Ilektoral Komisina Simon Sinai i bin givim namba tu ful ripot bilong ilektoral komisin bihain long em i pinisim olgeta wok painimaut na ol konsaltesen long las wik Fraide.

Namel long dispela ol konsaltesen wok i bin gat 5-pela tim i bin go karim wok long Hailans rijon, tupela tim i bin go long Niugini Ailan rijon, wanpela i go long Sauten rijon na wanpela long Momase rijon.

“Mipela i bin inapim olgeta provins long karim aut dispela risets long painimaut na skelim hamas provins bai inap kamap long neks yia 2022 jeneral ileksen wantaim wan wan mak bilong,” Komisina Sinai i tokaut long midia konprens las wik.

Mista Sinai i tok bihain long dispela olgeta wok painimaut ol i bin kam bek na lukluk long bungim olgeta ripot wantaim na wok aninit long mama lo bilong kantri na failim ol ful fainel ripot bilong ilektoral baundri.

“Mipela olgeta Komisina i bin sindaun wantaim wanpela ful wik long bungim olgeta ilektoral baundri ripot bilong wok painimaut bihan long holim namba wan konsaltesen,” Mista Sinai i tok.

Em i tok namba tu raun em bilong go wokim pablik konsaltesen na tokim ol pablik na pati bilon ol long dispela wok painimaut bilong ol ilektoral baundri projek. Sinai i tok namel long dispela ol wok painimaut bilong ilektotoral baundri ol i bin kamap wantaim 22 ilektoret husat i inapim olgeta lo bilong ileksen. Ol i bin selektim dispela 22 provins namel long ol sampela eria we i gat gutpela mak.

Ol provins em; Milne Bay, Noten, Westen, Galf, Sentral, Manus, Is Sepik, Madang, West Sepik, Nu Ailan, Is Nu Briten, Wes Nu Briten, Morobe, Hela, Jiwaka, Westen Hailans, Sauten Hailans Provins na Enga provins beis long wok panimaut.

Sampela bilong ol dispela provins Komisina Sinai i no bin tokaut bikos long sampela samting i holim ol bek pastaim.

“Mipela nau bai kisim fainel ripot bilong jeneral pablik long sekim ol sapot ol wanbel o no gat wantaim astingting bilong ol,” em i tok.

Em i tok bihain long ol i kamap wantaim fainel ripot ol bai presentim long Novemba palamen kibung olsem fainel ripot bilong baundri komisin.

“Mipela bai trevol gen long kisim fainel ripot beis long tingting bilong ol na askim ol sapos ol wanbel o no gat na tu givim ansa bilong ol wan wan long taim bilong ileksen,” Sinai i tok.

“Mi laik askim olgeta pipel olsem ol i mas kamap long konsaltesen,” em i tok.

Dispela ripot i no fainel tasol bilong ol long lukim na mekim fainel toktok long dispela bihain long ol i wokim fainel baundri riviu ripot na givim palamen pastaim long ileksen.

Jacklyn Kimala i raitim