STAT long Mande dispela wik Nasarin Misin Haus Sik long Kudjip, Jiwaka Provins i stat yusim kontijensi plen bilong en. Em i mas katim bek ol sevis bilong en long wanem em i stap long mak bilong pas bikos em i sot tru long mani bilong ranim dispela haus sik.

Sif Ekseketiv Opisa bilong Kudjip haus sik Dokta Greg L Maurer i tok ol i kamapim wanpela kontijensi plen pinis na ol i stat yusim long Mande 30 Ogas. Em i min ol i katim ol sevis bilong en long provins.

Olgeta sevis bilong autpeisen ol i stopim na ol i no inap kisim moa nupela keis bilong ol sikmanmeri. Ol bai i stap sambai long imejensi na mama i laik karim bebi tasol. Dispela haus sik i gat foapela wod. Nau ol bai i yusim tupela wod tasol. Long namel bilong mun Septemba ol i plen long katim namba bilong ol wok manmeri na tu ol bai i katim aua bilong ol long wok.

Nasarin haus sik i mekim olsem i go na redi long pasim olgeta haus sik sevis bilong en long Novemba 1, 2021.Stat long 2020 i kam inap nau em i save kisim ol liklik mani tasol long helpim tasol i no inap long karim auto l operesen bilong haus sik.

Dokta Maurer i tok ol plen bilong eksen i no samting ol i laik lukim i kamap tasol ol i pilim sotwin tru na ol i mas pasim haus sik. Em I tok ol I bilip wanpela gutpela resolusen bilong imejensi mani bai I kamap dispela wik. Ol I gat gutpela sapot I kam long Praim Minista James Marape, Nesenel Dipatmen bilong Helt, Dipatmen bilong Treseri, Gavana bilong Jiwaka Dr William Tongamp na Provinsal Helt Atoriti.

Nasarin haus sik i bin stat long 1967. Em i sevim Westen Hailans, Simbu na Jiwaka Provins long planti yia pinis. Ol arapela provins tu i save benefit long dispela haus sik.

Em i gat 120 bet bilong ol sik manmeri na 120 helt woka. Hapsait long wok bilong en Nasarin Misin i gat wanpela skul bilong ol nest u husat i save kisim prektikel bilong ol long dispela haus sik.

Sapos dispela haus sik i pas ol sikmanmeri bai i kisim bikpela taim tru long bihain taim tu, wanpela komyuniti mausman i tok.

Em i singaut long Praim Minista i mas lukluk na helpim dispela haus sik.