SPESEL Polis Fosenik Kriminal Investigesen Tim (SPFCIT) i arestim bipo Kiunga Benk Saut Pasifik (BSP) Financial Group Limited opisa, Ivy Moken long Westen Provins las wik. Dispela long paul na stil pasin bilong K268 milien.

Dispela mani i kam long Ok Tedi Main wok na i go long 147,000 manmeri bilong 158 komyuniti we wok bilong Ok Tedi Main i pas long em. Dispela mani em Ok Tedi Fly River Development Foundation Limited (OTFRDF) i lukautim. Tasol menesmen na ol dairekta bilong OTFRDF i paulim na yusim long wei bilong ol yet. Dispela i brukim lo na i asua na Polis Komisina David Manning i go pas long polis tim na mekim wok painimaut na i wok long arestim na sasim ol manmeri i pas long dispela asua. Polis i mekim dispela wok painimaut long las 10-pela mun na i wok long mekim wok painimaut yet. Ol manmeri na ol ogenaisesen husat i mekim dispela asua i kisim ol lain olsem Sif Ekseketiv opisa bilong OTFRDF Samson Jubi, biknem loya Gregory James Sheppard bilong Young na Williams Loa kampani, ol dairekta

bilong OTFRDF em Steven Bagari, Sisa Baidam, Abel Daruko, Michael Lam, Jacob Kabogi, Boston Kasiman, Edna Oai, Rex Salle, na Annie Smerewai. Ol dairekta Kasiman, Oai na Smerewai em polis i sasim ol long 15 kaun bilong misapropriesen (paulim na yusim mani long rot we i no mas kamap), 5-pela kaun bilong giaman tok na 5-pela kaun bilong giaman pasin. Polis i kisim tok long 17 Jun, 2021 olsem Sheppard na Jubi i kamap long Ivy na grisim em long printim ol benk ripot bilong lokal kampani em Pape Akaunten na Bisnis Edvaisa we Spesel Polis Konstabel Andy Peperaija Pape i go pas long em. Wantaim em, em tripela arapela memba bilong SPECIT i papa bilong dispela kaun em Polis Diktetiv Saiden Philip Yonge, Ditektiv Senia Konstabel Derick Tangua na Diktetiv Senia Konstabel Belden Robert. Polis i bin kisim ol Kot Oda, sekim ol pepa long BSP na i painimaut olsem ol benk ripot bilong SPFCIT em ol i no bihainim lo bilong benk na i printim. Long 26 Jun, 2021 Misis Moken i harim na bihainim tok bilong Jubi na Sheppard na printim dispela akaun ripot wantaim nogat tok orait bilong ol papa bilong dispela

kaun. Dispela i brukim ol proses na prosija bilong BSP Financial Group Limited. Polis i sekim ripot bilong ol 6-pela wan wan ol akaun na painimaut olsem wan wan bilong dispela ol akaun mani i bin go insait long ol long 26 Jun, 2021 na dispela ol akaun em Ivy i mama bilong ol. Bungim dispela ol mani, mak bilong mani i sanap olsem K13,000. Dispela ol mani i kam long Mundi No. 1 Limited em Jubi i operetim. Jubi i yusim Intarnet benking sistem long salim dispela ol mani. Polis i painimaut olsem Jubi i yusim dispela mani long grisim Ivy long printim ol benk ripot. Polis i askim Misis Moken long 15 Ogas, 2021 long Kiunga Polis Stesin na em i tokim polis olsem Jubi na Sheppard i grisim na subim em long printim ol benk akaun ripot. Bihain em i givim dispela ol ripot long man bilong em husat i skenim na emailim ol i go long Jubi long Australia. Ivy i tok em i redi na i laik kamapim Konpesio ripot na i stap olsem witnes bilong gavman long dispela wok painimaut.